Tatar yäşläre cıyınında Om, Yekaterinburg, Pervoural'sk şähärlärennän kilgän wäkillär dä qatnaştı

(Tömän, 12 fevral', “Tatar-inform”, Bibinur Sabirowa). Tatar yäşläre cıyını Tömän ölkäse tatarları Kongressınıñ yäşlär belän idarä itü departamentı citäkçese, “Yäş buın” oyışması räise Färit Kormanov citäkçelegendä äzerlänep ütkärelde.
Bu oçraşunıñ töp maqsatı - Tömän yäşläreneñ kürşe töbäklärdäge yäşlär oyışmaları belän üzara xezmättäşlek itü turında kileşü tözügä äzerlekne başlap cibärü, diärgä bula.
Qatnaşuçılar yäşlär arasında başqarğan eş täcribäläre belän urtaqlaştılar, tuğan telebezneñ, dinebezneñ, milli ğoref-ğadätlärebezneñ yazmışı turında borçılıp söylädelär.
Färit Kormanov “Yäş buın” oyışmasınıñ awıllarğa yörep çığışlar yasağan konsert brigadası, yäşlärneñ sport masterı Wäkil Tilimbaev citäkçelegendä sportnıñ törle törlärenä tartıla başlawları, yäşlär arasında voleybol, mini-futbol yarışlarınıñ uñışlı ütüe, yal kiçäläre, yäşlär xäräkätenä Nurulla Sattarov belän Rinat Nasıyyrov citäkçelegendäge ölkä tatarları Kongressınıñ yärdäme turında qanäğätlek xise belän söyläsä dä, eştä iñ zur qıyınlıq häm totqarlıq bulıp torğan finans mäsäläläreneñ awır xäl itelüen kürsätep, yuridik status alıp üz isäp-xisap sçetıybıyznı açsaq, ciñelräk bulır ide, dide.
Omski ölkäse milli-mädäni moxtäriäte qarşındağı “Almaz” yäşlär oyışması wäkile Çulpan Şixowa Ural-Seber regionında tatar yäşlärennän KVN komandası oyıştıru täqdimen citkerde.
Pervoural'sk şähäreneñ “Watan” yäşlär oyışması wäkile Denis Krotov 25 yıl däwamında eşläp kilgän “Ural moñnarı” cır ansamblendä yäşlärneñ dä qatnaşuları, tuğan teldä “Minem ilem” digän teletapşıyrular alıp barıluı, “İstina” digän dini gazeta çığıp toruı turında xäbär itep, tuğan telne saqlaw qıyınlıqları, tatar teleneñ ber Mixaylowsk digän awılda ğına uqıtıluı turında borçılıp söyläde.
Yäşlärneñ bu oçraşuı töple äzerlek belän ütkärelde, dip äytep bulmıy, anda konseptual' mäs'älälär qaralmadı, ämma tatar yegetläreneñ häm qızlarınıñ ber-berläre belän tanışuları, fiker alışuları, elemtälären nığıtırğa omtıluları kiläçäktä töbäqära üseş programmasın tözügä berençe nigez taşı bulıp yatar, dip ışanırğa bula.