Ayırım alğanda, Tatarstan Respublikasında neft' ximiäse produksiäsen daimi nigezdä satıp aluğa qarata qızıqsınu belderelde

(Mäskäw, 2 fevral', “Tatar–inform”, Rafis İzmaylov). Mäskäwdä RF Däwlät Dumasında Tatarstannan deputat, İran İslam Respublikası parlamentı (mäclese) belän elemtälär buyınça deputatlar törkeme koordinatorı Xafiz Salixov İran Säwdä palatası delegatsiäse belän oçraştı.
Rossiägä eşlekle vizit belän kilgän delegatsiäne İran Säwdä palatası räise Möxämmäd Nexavendiän citäkli. Oçraşuda şulay uq İran häm Rossiäneñ qatnaş säwdä palatası räise Äsädolla Äsğar–Äwladi, Tähran Säwdä–sänäğät palatası vitse–prezidentı, palatanıñ idarä äğzası häm kaznaçıysı Şahrox Zahiri, älege töbäk oyışmasınıñ general' sekretare Mähdi Rasex, İran İslam Respublikasınıñ Mäskäwdäge ilçelege wäkilläre, RF Säwdä–sänäğät palatasınıñ Rossiä–İran eşlekle sovetı general' direktorı Oleg Akuliniçev qatnaştı.
Ozaqqa suzılğan äñgämä barışında, tulayım alğanda, Rossiä–İran mönäsäbätläreneñ torışına, İran häm Tatarstan Respublikası arasındağı eşlekle, säwdä–iqtisadi bağlanışlarnı üsterügä qağılışlı mäs'älälär quzğatıldı.
Yaklar, ayırım alğanda, samoletlar tözü, ağrosänäğät kompleksı, ğaz suırtu stansiälären rekonstruksiäläü häm tözü ölkäsendä kooperatsiäneñ aldağı mömkinlekläre xaqında fiker alıştı. İrannıñ “Serjan Ğostan” kompaniäse wäkile Tatarstan Respublikasında neft' ximiäse tarmağı produksiäsen daimi nigezdä satıp aluğa qarata qızıqsınu belderde.