Töbäktä bu mäsäläneñ torışı belän ölkä Mädäniät komitetı räise Yevgeniy Neginski tanıştırdı

(Tömän, 2 fevral', “Tatar-inform”, Bibinur Sabirowa). Kiçä, 1 fevral'dä, Tömän ölkäse Xökümäteneñ prezidiumında töbäktä mädäniät häm sänğat obyektları normatiwlarınıñ ğamäldä torışı qaraldı.
Töbäktä bu mäsäläneñ torışı belän ölkä Mädäniät komitetı räise Yevgeniy Neginski tanıştırdı. RF Xökümäte uzğan yılnıñ 23 nçe noyabrendä qabul itkän yaña metodikağa nigezlänep qarağanda, Tömän cirendä teatrlar häm kitapxanälär sanı xalıq sanına turı kiterep qabul itelgän normatiwlardan da artıq ikän, konsert zalları da normadan kim tügel.
Kitapxanälärneñ fondına kilgändä isä, küpsanlı iskergän kitaplarnı qullanıştan çığaru kön mäsäläsenä äwerelgän. Kitapxanälärne yaña kitaplar belän tulılandırunı ike yaklap xäl itärgä täqdim itte YE.Neginski: uqu zalların Üzäk häm ölkä kitapxanäläre yärdämendä häm näşriätlär belän kileşülär nigezendä elektron varinattağı kitaplar belän, ä awıl mädäniät uçaqların, küçmä kitapxanälärne – käğäzdäge kitaplar belän tä'min itü. Elektron kitaplar belän tä'min itü programması 2014 nçe yılğa qadär bulğan waqıtnı üz eçenä ala.
Bu programmanıñ milli mädäniätlär xälen çağıldırmawına ğacäplänergä turı kilmi, çönki menä inde distä yıl däwamında ölkä mädäniät komitetı milli mädäniätlär xälen qaramıy, milli mädäniätlar mäsäläläre milli eşlär komitetına tapşırılğan xäldä qala birä.
Ölkä Milli mädäniätlar yortınıñ milli eşlär komitetı qaramağında eşläwçe tatar metodik bülege citäkçese Gölfiä Xälitowa süzlärenä qarağanda, tatar mädäniät uçaqlarınıñ, kitapxanälärneñ xalıq sanına turı kilü-kilmäwe açıqlanmağan, bu cähättän monitoring ütkärelmägän.
70 meñnän artıq tatar yäşägän ölkä üzäge Tömändä üz binası bulğan tatar mädäniät uçağınıñ, ber genä tatar kitapxanäseneñ, bernindi konsert zalınıñ bulmawı ğına da ölkä mädäniät komitetınıñ häm şähär citäkçelegeneñ cirle tatar xalqınıñ ruxi-mädäni ixtıäcların qanäğätländerü turında qayğırtmawın kürsätä.
Tatarlar küpläp kompaktlı yäşägän awıllarnıñ küpçelegendä mädäni uçaqlarnıñ bulmawı – üze ber zur mäs'älä.