D.Medvedev TR Däwlät Sovetına “Berdäm Rossiä” täqdim itkän keşelär arasınnan TR Prezidentı kandidaturası turında yazma ğariza tapşıraçaq

(Qazan, 25 ğinwar, “Tatar–inform”). RF Prezidentı Tatarstan Respublikası Prezidentı wazifasına kandidatlar isemlege belän kileşte. Däwlät başlığı boyırığı belän Prezident Administratsiäse citäkçeseneñ berençe urınbasarı Vladislav Surkov “Berdäm Rossiä” Bötenrossiä säyäsi partiäse General' sovetı Prezidiumına tieşle dokument tapşırdı.
D.Medvedev TR Däwlät Sovetına “Berdäm Rossiä” tarafınnan täqdim itelgän keşelär arasınnan respubliqa Prezidentı kandidaturası turında yazma ğariza tapşıraçaq. Bu xaqta RF Prezidentınıñ matbuğat xezmäte xäbär itä.
İskärtep uzabız, dekabr' axırında “Berdäm Rossiä” Tatarstan Respublikası Prezidentı wazifasına öç kandidatura täqdim itte. Alar tübändägelär – respubliqa Prem'yer–ministrı Röstäm Miñnexanow, Tatarstan Däwlät Sovetı Räise Färit Möxämmätşin häm Tatarstan Prezidentı Mintimer Şäymiew.
22 ğinwarda M.Şäymiew Dmitriy Medvedev belän oçraşuda Tatarstan Respublikası Prezidentı wazifasında üz wäqälätläreneñ waqıtın ozaytmaw turındağı mäsäläne qaramaw üteneçe belän möräcäğät itte. TR Prezidentınıñ wäqälätlär sroğı 25 martta tögällänä.
Bügen şulay uq Rossiä Prezidentınıñ Sarıtaw ölkä Dumasına “Berdäm Rossiä” Bötenrossiä säyäsi partiäse General' sovetı Prezidiumı tarafınnan täqdim itelgän keşelär arasınnan Sarıtaw ölkäse gubernatorı kandidaturası turındağı yazma ğariza tapşıraçağı xaqında mäğlüm buldı.
“Berdäm Rossiä” Sarıtaw ölkäse gubernatorı wazifasına xäzerge gubernator Pawel İpatov, “Berdäm Rossiä” töbäk säyäsi sovetı sekretare Petr Glıyboçko häm Sarıtaw ölkä Duması Räise Waleri Radaev kandidaturaların kürsätte.