Ufadağı Kongress-xoll binasında Başqortstan xökümäteneñ kiñäytelgän kollegiä utırışı bulıp ütte

(Ufa, 3 avgust, “Tatar-inform”, Fänis Fätxullin). Ufadağı Kongress-xoll binasında Başqortstan xökümäteneñ kiñäytelgän kollegiä utırışı bulıp ütte. Anda bıyılğı berençe yärtıyıllıq eş näticäläre tikşerelde.
Kiñäşmädä respubliqa xucalığınıñ här tarmaqları – sänäğät tä, awıl xucalığı, transport, tözeleş häm sotsial' ölkälär dä täfsille bäya aldı. Ğomum genä yomğaq şundıy ide – Başqortstan iqtisadı da, bar dönya yäşäyeşeneñ ber öleşe bularaq, zur qıyınlıqlarğa duçar, şulay da töşenkelekkä birelep utıru yaramıy.
Xökümät utırışında prem'yer-ministr Rail Sarbaev, anıñ urınbasarları, finans ministrı Ayrat Gaskärov, sänäğät häm tışqı iqtisadıy bäyläneşlär ministrı Yuri Pustovgarov, iqtisadi üseş ministrı Yevgeniy Yevtuşenko çığış yasadı. Şulay uq başqa şirkätlär häm rayonnar, şähärlär citäkçeläre dä fiker alışularda qatnaştı.
Sänäğät şirkätläre älege qatlawlı şartlarda ayıruça zur awırlıq kiçerä. Xätta elek respubliqa byudjetın tulılandıruğa baytaq öleş kertüçe “Salavatnefteorgsintez” şirkäte dä zıyanğa eşläp yata. Anıñ general' direktorı Damir Şäwäliew çığışınnan kürenüençä, uzğan yartı yılda şirkät 3 milliard sumğa yaqın zıyan kiçergän. Xäzerge qıyınlıqlar däwam itsä, bu yıl azağına älege küläm tağın da artırğa mömkin dip iskärtte Damir Şäwäliew.
“Salavatnefteorgsintez” şirkäte başlığı üzlärendäge citeşsezleklärne zaman awırlıqları belän bäyläp añlatsa, respubliqa prem'yer-ministrı da, iqtisad ministrı Yevgeniy Yevtuşenkov ta şirkätneñ zıyanğa eşläwen andağı citäkçelärneñ buldıqsızlığınnan kürüen assızıqladı. Ayıruça Rail Sarbaevtan qatı eläkte Salawat şähäre nefteximiklarına.
Mäğlüm ki, “Salavatnefteorgsintez” şirkäte berniçä yıl elek Mäskäw qaramağına küçkän ide. Aña direktornı da, başqa qayber menedjerlarnı da Mäskäwdän kiterdelär.
Älbättä, zaman awırlıqları da bu danlıqlı şirkätne qıyın xälgä quydı. Kemgä ciñel inde xäzer. Şuña da şirkätneñ yaña xucaları üzlärenä respubliqa xaqimiätläre tarafınnan bulğan tänqitne häm basımnı ğadel tügel dip sanawın belderä.
Başqortstan xökümäte kollegiäse utırışında başqa şirkätlärneñ bügenge xälenä dä analiz birelde. Prem'yer-ministr tözeleştäge xällärgä dä qanäğätsezlek belderde. Bıyıl respublikada 2 millionnan kübräk kvadrat metr toraq tözelergä tieş bulsa, yartı yılda şunıñ öçtän bere genä başqarılğan.
Awıl xucalığı öçen dä bıyılğı yılnıñ awır buluı bilgelände häm xalıqnı qışqı çorğa azıq-tölek belän tä'min itü çaraların bügennän ük nıqlap kürü kiräklege äytelde.