Universiadanı açu tantanasında 143 ilneñ delegatsiäläre qatnaştı

(Qazan, 2 iyul', “Tatar–inform”). Kiçä Belgradnıñ 20 meñ tamaşaçı sıydırışlı basketbol arenasında XXV Bötendönya cäyge universiadasın açu tantanası buldı.
Universiadanı açu tantanasında 143 ilneñ delegatsiäläre qatnaştı. Rossiä delegatsiäse – Belgradtağı iñ küp sanlı delegatsiälärdän berse (anıñ sostavında 400 dän artıq sportçı bar). Rossiälelär sostavında Tatarstan danın 11 student yaklıy. Universiadada berençelärdän bulıp basketbolçıylar häm vaterpolçıylar çığış yasayaçaq, dip xäbär itä TR Yäşlär eşläre, sport häm turistlıq ministrlığınıñ matbuğat xezmäte. İrtägä Mäskäw waqıtı belän 14.30 säğättä “Jeleznik” arenasında basketbol buyınça irlär cıyılma komandası Gabon komandasına qarşı täwge matçın ütkärä. Rossiälelär sostavında “UNİKS”nıñ ike basketbolçıysı – Aleksey Jukanenko häm Yevgeniy Voronov bar.
Vaterpol buyınça Rossiä studentlar cıyılma komandası sostavında Qazannıñ “Sintez” klubınnan ike saqçı – Pawel Katkov häm Artem Odinsov çığış yasıy. Vaterpolçılarnıñ törkem buyınça köndäşläre: İspaniä, Qıtay häm İtaliä cıyılma komandaları.
Sportnıñ şäxsi törlärendä Tatarstannan ciñel atletlar Tat'yana Şutowa (10000 metrğa yögerü, yarışlar 7 iyul'dä başlana), Ol'ğa Zäynetdinowa (küp tör yarış, 10 iyul') häm Nadejda Sazonowa (4х400 metrlı estafeta, saylap alu yarışları 11 iyul'dä başlana) çığış yasayaçaq. Yözüdä respublikabıyz danın Aleksandr Şimin (saylap alu yarışları 5 iyul'gä bilgelängän), tennista Kseniä Lıqina (berençe äyläneş matçları 3 iyul'dä başlana) yaklıy. Tatarstannıñ fextowanie mäktäben şpagaçıylar Ramil Ğaysin häm Yılena Şaşarina täqdim itä.