Ufada tatarnıñ asıl qızın qotladılar
9 Iyun' 2009 ã., 18:04— Rossiä yañalıqları
(Ufa, 9 iyun', “Tatar-inform”, Fänis Fätxullin). Başqortstan tatarları arasında iñ tanılğan şäxeslärneñ berse, Ufa däwlät sänğat akademiäse möğallimäse, professor Färdünä Qasıymowa tormışında istälekle waqiğa.75 yäş tuldı aña bügen. Şuşı uñaydan anı xezmättäşläre häm uquçıları ixlas qotladı. Ufa däwlät sänğat akademiäsendä çäçäklär göllämälärenä häm büläklärgä kümdelär Färdünä Qasıym qızı Qasıymowanı.
Bäräkätle Baltaç rayonı taraflarında tuıp üskän F. Qasıymowa bar ğomeren sänğat'kä häm yäşlärgä teatr sänğate serlären öyrätügä bağışladı. Zahir İsmäğilew isemendäge Ufa däwlät sänğat akademiäsendä qırıq yıldan artıq xezmät itä ul. Akademiädä drama rejisserlığı kafedrasına citäkçelek itüçe talantlı millättäşebez taliplarğa akter ostalığı neçkäleklären töşenderä. Ufa “Nur” tatar däwlät drama teatrına da, Tuymazı tatar däwlät drama teatrına da distälärçä sälätle yäş akter äzerläp çığardı Färdünä Qasıym qızı.
Sänğat ölkäsendä ozaq yıllar tuğrı eşçänlege öçen, F. Qasıymowağa Rossiä Federatsiäse Yuğarı mäktäpläreneñ atqazanğan xezmätkäre, Başqortstan Respublikasınıñ atqazanğan sänğat eşleklese digän maqtawlı isemnär birelde. Ul şulay uq Rossiä Federatsiäse teatr eşlekleläre berlege premiäse laureatı da. Ataqlı möğallimä bügenge köndä dä yäşlär belän därmanlı eşli, alarnı olı sänğat'kä äzerli.
Temağa bäyle sıltamalar: