Ç.Zarif-Çetin töreklärgä tatar ädäbiätın Ğ.İsxaqi äsärläre aşa tanıtırğa teläp, ädipneñ xikäyälären tärcemä itkän

(İstanbul, 22 ğinwar, “Tatar-inform, Ruşaniä Altay). Tatar ädäbiätınıñ klassik yazuçısı Ğayaz İsxaqi ğomereneñ şaqtıy öleşen Törkiädä uzdıruına karamastan, äsärläre ozaq yıllar törekçägä tärcemä itelmägän ide. Şulay bulsa da, 1990нчы yıllarda Ötükän näşriätı anıñ “Öygä taba”äsären törekçägä äyländerep, ädäbiät söyuçelär iğtibarına täqdim itte häm ul törek mäğärif ministrlığı tarafınnan litseylarnıñ ädäbiät programmasına da kertelde.
Soñğı yıllarda isä Ğayaz İsxaqinıñ icatın, tormışın centekläp öyränüçe ğalimnär sanı işäyu belän bergä, anıñ äsärlären törekçä uqu mömkinlege dä arta tora. 2003 yılda ädipneñ tuuına 125 yıl tulu cähätennän “Sönnätçe babay” äsäre rus, ingliz häm törek tellärendä dönya kürgän ide. Äle küptän tügel genä Muğla universitetınıñ Xäzerge zaman törki tellär häm ädäbiätları bülege ğalimäse, millättäşebez Çulpan Zaripowa-Çetin İsxaqinıñ 6 äsären törekçägä tärcemä qılıp, kitap itep bastırdı. “Ğayaz İsxaqi. Xikäyälär (saylanma äsärlär)” dip atalğan bu basma Muğla universitetı näşriätında çıqqan. Anda oluğ ädipneñ ”Kötelgän bikäç”, “Ostazbikä”, “Käcül çitek”, “Kiäw”, “Yılaq Xäyrulla” digän xikäyäläre urın alğan. Kitap “Sönnätçe babay” äsäre belän başlanıp kitä. Anı da Çulpan Zaripowa-Çetin üze tärcemä itkän. Kitapnıñ redaktorı – şul uq uqu yortı ğalime Xayäti Yılmaz.
181 bitlek kitapnıñ tışlığına rässam A.K Säyfetdinownıñ “Tatar kilene” digän milli üzençälekle kartinası töşerelgän.
Muğla universitetında törki xalıqlar ädäbiätı däresläre birüçe ğalimä bularaq, avtor tatar xalqınıñ tormış-könküreşen, milli yolaların, ğoref-ğadätlären, problemaların yaktırtuçı äsärlärgä tuqtalğan. Ä bolarnıñ barısı da Ğayaz İsxaqi icatında açıq çağıla. Anıñ äytüençä, tatar ädäbiätın añlatqanda studentlarğa: “Menä şul äsärne uqığız”, - dip äyterlek törekçä äsärlärneñ bulmawı canğa tigän. Çulpan xanım İsxaqi xikäyälären älege mäsäläne ciñeläytü öçen häm ädäbiätıbıznı añğa señdererlek itep tanıtu maqsatlı tärcemä itkän. Kiläçäktä dä Çetin tarafınnan äle tağın bik küp tatar ädäbi äsärläre tärcemä iteler kebek.