Qırımda tağın ber Yazuçılar berlege açıldı
22 Iyul' 2008 ã., 18:59— Çit il yañalıqları
(Simferopol', 22 iyul', «Tatar-inform», Diläwär Osmanov). Kiçä Simferopol'da ütkän cıyılışta küpçelek tawış belän şağir, qırımtatar ädäbiätı tarixı buyınça zur külämle xezmät avtorı Riza Fazıl Qırımtatar yazuçılar berlege räise itep saylandı. Berlekneñ särqatibe itep D.Osman bilgelände.Utırışnı şağir Şaqir Sälim açtı, ul kilep tuğan qayber şartlarğa häm awırıp kitügä bäyle räweştä räis wazifası urının qaldıruın häm bu urınğa R.Fazılnı täqdim itüen belderde. Yazuçılar fiker alışqannan soñ R.Fazıl kandidaturası tawış birügä quyıldı häm ber tawıştan saylandı, şulay uq Sovet särqatibe da bilgelände.
Cıyılışta Mäcles räise urınbasarı, Qırımnıñ deportatsiälängän grajdannar eşläre häm millätara mönäsäbätlär buyınça komissiä räise Rämzi İl'yasov qatnaştı.
Bilgele bulğança, Qırımda 1934-1944 yıllarda qırımtatar ädipläre idarä itkän Yazuçılar berlege bulğan. Yaña berlek qırım tatarların deportatsiälägäç beterelgän oyışmanı yañadan torğızu maqsatınnan oyıştırıldı.
Bu qararğa Uqraina Milli yazuçılar berlege 2007 yılnıñ noyabrendä ütkän üz prezidiumında teläktäşlek beldergän. Böten qırım tatarları da Uqraina Milli yazuçılar berlege äğzası bulıp tora, xäzer alarnıñ Qırımda üz oyışmaları da bar.
Temağa bäyle sıltamalar: