Bügen Tatarstan Respublikası Prem'yer–ministrı Çistay rayonına säfär qıldı

(Çistay, 18 fevral', “Tatar–inform”, Sergey Semerkin). Bügen Tatarstan Respublikası Prem'yer–ministrı Röstäm Miñnexanow Çistay munitsipal' rayonına säfär qıldı.
TR Xökümäte başlığı 2006 yılnıñ oktyabrendä Çistaynıñ elekkege 11 nçe tegü fabrikası mäydanında tözelgän “Ştil'” CÇCndä buldı. Xäzerge waqıtta biredä 9000 kvadrat metrnı bilägän mäydanda 500 berämlek tegü cihazı eşli, alarda 400 keşe xezmät quya. 2009 yılda predpriätie 72,7 million sumlıq eş başqarğan.
Şunnan soñ Röstäm Miñnexanow mädäniät üzäge binasına täwge taş salu tantanasında qatnaştı. Yaña kompleks Lenin uramında 3300 kvadrat metr mäydanda tözeler dip kötelä. Proektnıñ yaqınça bäyäse – 150 million sum. Älege sotsial'–mädäni obyektnıñ şähär öçen ähämiäte zur, çönki 2007 yılda tözekländerü eşläre waqıtında şähär Mädäniät yortı cimerelgän ide. “Bügen Çistay şähäre öçen istälekle waqiğa. Küpmeder waqıt uzğaç, yaña üzäk Çistay xalqına mädäni xezmät kürsätä başlayaçaq”, – dip belderde Çistay rayonı başlığı Vyaçeslav Kozlov tantanada yasağan çığışında.
Röstäm Miñnexanow bilgeläp ütkänçä, yaña mädäniät üzäge “Tatneft'” AACneñ östämä keremnäre xisabına tözeläçäk. “Sezne älege waqiğa belän qotlıym, bu obyektnı ber yıl eçendä safqa bastırırbız dip ömetlänäm”,– dide TR Prem'yer–ministrı.
Tantanada şulay uq TR Prem'yer–ministrı urınbasarı – mädäniät ministrı Zilä Wäliewa, Çistay rayonı başlığı Vyaçeslav Kozlov, “Tatneft'” AAC general' direktorı Şäfäğät Tähäutdinow häm “Yamaş–neft'” YAAC başlığı Viktor Smıykov qatnaştı.