Eçke eşlär orğannarı häm TR buyınça EEMnıñ maxsus bilgelänüdäge militsiä otryadı xezmätkärläre Tönyak Kavkaz töbägenä kitte

(Qazan, 17 fevral', “Tatar–inform”). Bügen eçke eşlär orğannarı häm TR buyınça Eçke eşlär ministrlığınıñ maxsus bilgelänüdäge militsiä otryadı xezmätkärläre Rossiä Eçke eşlär ministrlığı orğannarı häm bülekçäläreneñ waqıtlı operativ törkeme sostavında yartı yılğa Tönyak Kavkaz töbägenä yul tottı. TR buyınça Eçke eşlär ministrlığınıñ Memorial'–kul't kompleksı yanına alarnı ozatırğa TR eçke eşlär ministrınıñ berençe urınbasarı Renat Timercanov, TR Däwlät Sovetı deputatı Rafil Nogmanov, ministrlıq citäkçeläre, TR Eçke eşlär häm eçke ğaskärlär orğannarınıñ suğış xäräkätläre veterannarı berläşmäse räise Mixail Osnov, ruxanilar häm militsionerlarnıñ ğailäläre kilgän ide.
“Bezneñ militsionerlar 2001 yıldan birle Tönyak Kavkaz töbägendä üzläreneñ xezmät häm grajdanlıq burıçların üti. Uzğan yıllar kürsätkänçä, quyılğan barlıq burıçlar da iñ yuğarı däräcä ütälde häm ütälä”, – dip assızıqladı Renat Timercanov. Ul militsionerlarğa uñışlar, sälämätlek, xäyerle yul häm isän–imin äylänep qaytuların teläp qaldı.
Şunnan soñ militsionerlar üzläreneñ tuğannarı belän xuşlaştı häm yıraq yulğa quzğaldı. Komandirovqa yartı yıl däwam itäçäk, dip xäbär itä TR buyınça Eçke eşlär ministrlığınıñ mäğlümat häm cämäğätçelek belän elemtä bülegeneñ matbuğat xezmäte.