R.Miñnexanow komandağa “Mersedes” avtobusı häm ike “Fiat Dukato” mikroavtobusı açqıçların tapşırdı

(Qazan, 16 fevral', “Tatar–inform”). “Rubin” futbol klubı – ul Tatarstan Respublikası baylığı”, – dip belderde kiçä TR Prem'yer–ministrı – “Rubin” futbol klubınıñ popeçitel'lär sovetı räise Röstäm Miñnexanow futbolçılar belän oçraşuda.
Oçraşu barışında ul sportçılarnıñ sorawlarına cawap birde, alarğa bıyılğı sezonda uñışlı çığış yasawların teläde. “Bez sezneñ ciñülär belän ğorurlanabız, sezneñ öçen can atabız”, – dide Röstäm Miñnexanow sportçıylarğa möräcäğät itep.
“Rubin” – ul respubliqa baylığı, – dip belderde TR Prem'yer–ministrı. – Sez il çempionı isemen yaulağaç, bu oçraqlı xäl, dip fiker yörtüçelär dä buldı. Ämma sez çempion isemen rasladığız”.
Monnan tış, Röstäm Miñnexanow bilgeläp ütkänçä, bügen “Rubin” öçen BDB illäre genä tügel, Rossiä belän duslarça mönäsäbättä bulğan däwlätlär dä can ata.
“Komanda ruxınnan başqa, ciñügä omtılmıyça uynaw mömkin tügel”, – dip sanıy Tatarstan Xökümäte başlığı. Ul komandanıñ 2010 yılğı yarışlarda layıklı çığış yasayaçağına ömet belderde.
“Rubin” futbol klubı prezidentı Aleksandr Gusev sezonğa qısqa näticä yasadı. Anıñ süzlärenä qarağanda, sezon komanda öçen uñışlı buldı. Misal öçen, “Rubin” ike märtäbä il çempionı bulıp tanıldı, Çempionnar ligasında uñışlı çığış yasadı. Ämma quldan ıçqındırğan mömkinleklär dä yuk tügel. Ayırım alğanda, komanda Rossiä Quboğında, başqa uyınnarda ottırdı.
“2010 yılda bezneñ alda quyılğan burıçlarnı 100 protsent ütärgä kiräk”, – dide Aleksandr Gusev. Ul iskärtep uzğança, “Rubin” Awropa Ligasında çığış yasıy, 18 fevral' könne Qazanda İzrail'neñ “Xapoel'” komandası belän täwge oçraşu uza, ä 25 fevral'dä komanda İzrail'dä tağın ber matç ütkärä. “Rubin” futbol klubı prezidentınıñ süzlärenä qarağanda, komandanıñ xalıqara oçraşular uzdıruda täcribäse bar inde, şulay bulğaç Awropa Ligasında uñışlı çığış yasarğa kiräk.
Monnan tış, Aleksandr Gusev iskärtkänçä, bıyılğı sezonda Tatarstan Respublikası Prezidentı Mintimer Şäymiew “Rubin” futbolçıları aldına ilneñ öç märtäbä çempionı isemen yaulaw burıçın quydı.
“Rubin” futbol klubınıñ popeçitel'lär sovetı räise bularaq, Röstäm Miñnexanow komandağa “Mersedes” avtobusı häm ike “Fiat Dukato” mikroavtobusı açqıçların tapşırdı.
Oçraşuda Qazan merı İlsur Metşin, “Tatenergo” AAC general' direktorı İlşat Färdiew, “TAİF” AAC general' direktorı Al'bert Şihabetdinow qatnaştı, dip xäbär itä TR Ministrlar Kabinetınıñ matbuğat xezmäte.