G.Tuqay isemendäge Tatar däwlät filarmoniäsendä yubiley konsertı uzdı

(Qazan, 16 fevral', «Tatar-inform», Lyutsiä Qamalowa). Kiçä G.Tuqay isemendäge Tatar däwlät filarmoniäsendä legendar tatar cırçısı, Rossiäneñ häm Tatarstannıñ xalıq artistı İlham Şakirov 75 yäşlek yubileen bilgeläp uzdı.
Tamaşaçılar tatar xalqınıñ yaratqan cırçısın basıp qarşı aldı. Bu bäyräm kiçendä cırçını TR Prem'yer-ministrı urınbasarı – mädäniät ministrı Zilä Wäliewa qotladı.
“Bügen böten tatar xalqı öçen zur bäyräm”, - dide ul cırçığa möräcäğät itep. Zilä Wäliewa Tatarstan Prezidentı Mintimer Şäymiewneñ qotlaw telegrammasın uqıdı häm bu cırçınıñ sawbullaşu konsertı tügel, ä yubiley tantanalarınıñ başı ğına dide.
“Tatar cırı bulğanda, bezneñ xalıqnıñ kiläçäge bar”, - dide yubilyar. Cırçınıñ küptänge dustı Şamil Xäkimow Üzbäkstannan ğadäti bulmağan büläk alıp qaytqan. Ul yubilyarğa keläm, vaza, çapan häm altın ceplär belän tegelgän baş kieme häm istälek öçen Boxaradan alıp qaytılğan qılıç ta büläk itte.
Bu kiçtä tatar estradası metrınıñ xezmättäşläre häm uquçıları çığış yasadı. Alar arasında Ä.Avzalova, X.Timerğaliewa, F.Gaffarov, G.İbuşev, R.Malikov, Z.Sönğatullina, V.Ğaniewa, S.Fatxetdinov, İ.Gaziev, F.Qahirow, A.Sağınbayıwa, R.Fasıyyxov, Asılyar, V.Şämiewa, «Zöläylä» bar ide.
Säxnägä quyılğan zur ekrannan Rossiä şähärläre tamaşaçılarınıñ ğına tügel, ä çit illärdä yäşäwçe tatar başqaruçınıñ icatın yaratuçılarnıñ da qotlawları yañğıradı. Başqortstan Prezidentı Mortaza Räximow, TR Däwlät Sovetı Räise Färit Möxämmätşin isemennän dä telegrammalar da uqıldı.
İlham Şakirov bäyrämneñ final öleşendä öç cır cırladı. Anıñ soñğısı “Yäşlegemä kire qaytır idem” dip atala ide. Filarmoniädä yubiley konsertları tağın ike kön däwam itäçäk. Bıyıl yubiley programmasın qazanlılar ğına tügel, ä Rossiäneñ başqa şähärlärendä dä kürä alalar, çönki İlham Şakirov qatnaşında gastrol'lär uzaçaq.