EVCA da äğza bulıp toru TRnı finans dairäläre, biznes häm wençur tarmağı wäkillärenä täqdim itärgä mömkinlek biräçäk

(Qazan, 11 fevral', “Tatar–inform”). 2010 yılnıñ 23 aprelendä uzaçaq V Qazan wençur yärminkäsendä Awropa häm Ameriqa wençur investorları da qatnaşa.
Bügen “Tatar–inform” mäğlümat agentlığı xäbärçesenä TR İnvestitsiä–wençur fondı matbuğat xezmätennän belderülärençä, Qazan wençur yärminkäseneñ statusı fondnıñ Awropanıñ wençur häm turıdan–turı investitsiäläü assotsiatsiäsenä (EVCA) kerüe näticäsendä kütärelde. EVCA da äğza bulıp toru Tatarstannı Awropa illäreneñ finans dairäläre, biznes häm wençur tarmağı wäkillärenä täqdim itärgä, respublikağa çit illärdän wençur investitsiäläre cälep itärgä mömkinlek biräçäk.
Xäzerge waqıtta V Qazan wençur yärminkäsendä qatnaşu öçen ğarizalar qabul itü däwam itä. TR İnvestitsiä–wençur fondına täwge ğarizalar kilä başladı inde. IV Qazan wençur yärminäse başqalabızda TR İnvestitsiä–wençur fondı, Rossiäneñ wençur häm turıdan–turı investitsiäläü assotsiatsiäse, Amerikanıñ grajdanlıq tikşerenüläre häm üseş fondı ximayäsendä 24 aprel'dä uzdı. IV Qazan wençur yärminäsendä Tatarstan häm Rossiä Federatsiäseneñ törle şähärlärennän 40 kompaniä qatnaştı.
V Qazan wençur yärminkäsendä qatnaşu öçen üz biznesların üsterü öçen turıdan–turı şäxsi investitsiälär cälep itü belän qızıqsınğan, yuğarı östämä qimmät belän produksiä citeşterüçe häm xezmätlär kürsätüçe, proektnıñ eçke keremen yıllıq 30 protsenttan da kimräk tä'min itmäwçe, üseş tempları yuğarı bulğan kompaniälär çaqırıla. Şul uq waqıtta satular küläme häm kompaniäneñ qayçan oyışuı ähämiätle tügel. Yärminkäneñ töp üzençälege – keçe häm urta predpriätielärneñ zayavkalarına başlanğıç ekspertiza ütkärü, şulay uq menedjmentlar häm saylap alınğan kompaniälärneñ xucaların maxsus äzerläw.
Yärminkädä biznes tügel, ä tulayım alğanda biznes täqdim iteläçäk. Şuña bäyle räweştä maxsus kouçinglar qısalarında bazar, menedjment häm finans farazları mäsälälärenä töp iğtibar birü küzdä totıla.