14 fevral'dä Tatarstan “Rossiäneñ çañğı yulları” Bötenrossiä çañğı yarışlarında qatnaşa

(Qazan, 10 fevral', “Tatar–inform”, Mixail Mironov). “Rossiäneñ çañğı yulları–2010” Bötenrossiä çañğı yarışlarında çama belän 130 meñ tatarstanlı qatnaşır dip kötelä. Bügen TR yäşlär eşläre, sport häm turistlıq ministrı urınbasarı Xälil Şäyxetdinow jurnalistlarğa alda torğan waqiğanıñ neçkälekläre xaqında söyläde.
Bıyıl “Rossiäneñ çañğı yulları” Bötenrossiä çañğı yarışları Ğaşıyklar könendä – 14 fevral'dä uzaçaq. Ministr urınbasarınıñ süzlärenä qarağanda, Tatarstan monnan ber yıl elekkege kebek ük çañğı yarışlarında qatnaşuçılarnıñ sanı buyınça Rossiä töbäkläre arasında lider bulaçaq – startqa çama belän 130 keşe çığar dip kötelä.
Tatarstan başqalası Bötenrossiä çañğı yarışların inde altınçı märtäbä rättän qabul itä. Bıyıl iñ zur qolaçlı qışqı sport çarası beryulı 12 mäydançıqta uzaçaq. Mäskäw, Kirov häm Aviatözeleş rayonnarında töp start Aqqoş külendä bireläçäk, monnan tış, yarışlar “Polet” balalar sälämätländerü kompleksı yanında, Qadış bistäsendä häm “Atlaşkino” turistlıq bazasında oyıştırıla.
Vaxitov rayonında yarışlar – Ğor'ki parkında, Yaña Savin rayonında – Gavrilov häm Çuykov uramnarı çatı belän yänäşädäge Qazansu tuğayında, İdel buyı rayonında – Mirnıy bistäsendäge Eçke eşlär ministrlığı bazasında, Sovet rayonında – Därwişlär bistäsendäge Qayınlıqta, şulay uq “Komsomoles” kinoteatrı artında, Novatorlar häm Noksa awışlığı uramnarında uzaçaq.
Aqqoş külenä maxsus avtobuslarda barırğa mömkin, alar 9–15 säğätlärdä Lenin, Ximiklar Mädäniät sarayları yanınnan häm “Ğor'ki şossesı” tuqtalışınnan quzğalıp kitä. Mirnıy bistäsendäge Eçke eşlär ministrlığı bazasına isä Ciñü prospektınnan – İdel buyı rayonı bazarı yanınan utırıp kitärgä mömkin.
Tatarstannıñ barlıq şähär–rayonnarında “Rossiäneñ çañğı yulları” Bötenrossiä çañğı yarışları qısalarında VIP–uzışlar da oyıştırılaçaq, alarda rayon citäkçeläre qatnaşa. 2013 metr arağa töp VIP–uzış 14 fevral' könne 12.00 säğättä Aqqoş külendä başlana – biredä ministrlar, ministrlıq häm vedomstvo xezmätkärläre startqa çığaçaq.
Yarışlarnıñ ciñüçelären oyıştıruçılar häm iğanäçelär äzerlägän büläklär kötä. Şulay uq iñ ölkän häm iñ yäş qatnaşuçılarğa da büläklär tapşırılaçaq.
Bötenrossiä çañğı yarışlarınıñ oyıştıru komitetı tarafınnan respublikağa 20 meñ komplekt kiräk–yaraq bülep birelgän. Alarnıñ 13 meñe – Qazandağı yarışlarda qatnaşuçılar, 4 meñe – Çallıda, qalğan 3 meñe Tatarstan rayonnarı arasında bülenäçäk. Formanı alu öçen mandat komissiäsendä terkälergä kiräk. Qazanda ul 8–13 fevral' könnärendä 10.00–18.00 säğätlärdä Üzäk stadionda eşli.