Bügen TR Däwlät Sovetında TASSR oyışunıñ 90 yıllığın bilgeläp ütügä äzerlek buyınça oyıştıru komitetı utırışı uzdı

(Qazan, 9 fevral', “Tatar-inform”, Rimma Gatina). “Urınnarda TASSR oyışuğa 90 yıl tuluğa bağışlanğan çaralarğa äzerlek eşen tieşle däräcägä quyarğa, üz waqıtında respubliqa öçen yanıp-köep yörgän şäxeslärgä, alarnıñ tuğannarına iğtibarnı qızğanmasqa kiräk”, - dip belderde bügen TR Däwlät Sovetı Räise Färit Möxämmätşin TASSR oyışunıñ 90 yıllığın bilgeläp ütügä äzerlek buyınça oyıştıru komitetı utırışında. Respubliqa barlıqqa kilüneñ zur säyäsi waqiğa buluın häm bigräk tä munitsipal' berämleklärdä eşne aktiv cäyelderergä kiräklegen assızıqlap. Ul şulay uq berençe zatlarnı ğına tügel, waqiğalarnıñ böten aktivistların bilgeläp ütärgä çaqırdı.
Älege utırışta TR Prezidentınıñ Eçke säyäsät mäsäläläre buyınça idarä başlığı Aleksandr Terent'yev, TR Prem'yer-ministrınıñ berençe urınbasarı Rawil Moratov, munitsipal' berämleklär başlıqları, respubliqa ministrlıykları häm vedomstvoları citäkçeläre qatnaştı.
Oyıştıru komitetınıñ kön tärtibenä munitsipal' berämleklärdä bäyräm çaralarına äzerlek alıp baru, massaküläm mäğlümat çaralarında yubiley çaraların, TASSR oyışuğa qatnaşı bulğan zatlar häm waqiğalar turında yaktırtu, TR Fännär akademiäse tarafınnan illyustratsiäle häm fänni basmalar äzerläp çığaru, Qazanda “Tatarstan Respublikası: tarix häm xäzerge zaman” digän fänni-ğamäli konferensiä uzdıru, urınnarda TASSRnıñ 90 yıllığına nisbätle skver häm alleyalar yasaw mäsäläläre çığarılğan ide.
TR munitsipal' berämleklär sovetı räise Minsäğit Şakirov urınnarda yubiley çaralarına äzerlek turında xisap totıp, TASSR oyışuğa 90 yıl tulunıñ respubliqa öçen genä tügel, böten Rossiä öçen ähämiätle waqiğa buluın bilgeläp ütte. “Çönki näq menä şuşı waqıtta avtonomiäle respubliqa barlıqqa kilgän”, - dide ul. M. Şakirov urınnarda bu nisbättän Böek Watan suğışı veterannarı, tıl xezmätçännäre, tege yäki bu cirlekneñ xörmätle grajdannarı, respubliqa citäkçeläre belän oçraşular oyıştırıluın, kürgäzmälär, sänğat çaraları, tematik kiçälär uzdırıluın bilgeläp ütte. Ul şulay uq urınnardağı ziratlarda qaberleklärne yañartu, tärtipkä kiterü, ağaç-quaqlar utırtu mäsälälärenä dä tuqtaldı.
Utırışta şulay uq “Tatarstan: wexi istorii” al'bomın eşläp çığaru, “Tatar ensiklopediäse”neñ rus telendäge – 5 nçe tomın, tatar telendäge 2 nçe tomın xalıqqa täqdim itü, xäzerge waqıtta federal' arxivta saqlana torğan, respubliqa oyışu çaralarına bağışlanğan fil'mnarnı respublikağa qaytaru, yubileyğa nisbätle maxsus sayt eşläw, yubiley medalen yasatu mäsäläläre turında fiker alıştılar.