RF Prem'yer-ministrı fikerençä, däwlät xezmätlären elektron formağa küçerü alarnı sıyfatlı, uñaylı häm ütemle itä

(Ufa, 9 fevral', «Tatar-inform», Sergey Semerkin). Rossiä Federatsiäse Xökümäte Räise Vladimir Putin Ufada töbäklär üseşe mäsäläläre buyınça Xökümät komissiäse utırışı uzdırdı. Utırışta Rossiä Federatsiäse subyektlarında mäğlümat texnologiälären üsterü mäsäläse qaraldı.
Utırışta Tatarstan Prezidentı Mintimer Şäymiew, RF Xökümäte äğzaları, tarmaq ministrlıykları häm vedomstvoları, şulay uq töbäk citäkçeläre qatnaştı.
Vladimir Putin üz çığışında mäğlümat texnologiäläre küptän inde abstrakt häm añlayışsız buludan tuqtadı, keşelär aktiv räweştä annan räxätlänep faydalana, çönki alar ber kabinettan ikençesenä yörüdän qotqara, dip belderde. Mäğlümat kommunikatsiä texnologiäläre protseduralarnı tizlätergä häm qısqartırğa, byudjet çığımnarınıñ näticälelegen arttırırğa, korrupsiä cirlegen qısqartırğa, xaqimiätne açıq itärgä mömkinlegen birä.
Ber yılda Rossiä grajdannarı däwlät xezmätlärenä 350 million möräcäğät yasıy, dip statistiqa mäğlümatları kiterde Prem'yer-ministr. Bu RFnıñ här grajdaninı yılğa 3–4 tapqır xaqimiät orğannarına tege yäki bu xezmät buyınça möräcäğät itä digän süz.
Anıñ süzlärençä, yaqın kiläçäktä elektron formada däwlät xezmätläre kürsätü sisteması tözeläçäk. Teläsä nindi töbäktä yäki munitsipalitetta här grajdanin yaña infrastrukturanıñ mömkinleklärennän häm östenleklärennän faydalana ala. Här keşeneñ zamança yuğarı texnologik xezmätlärgä şäxsi elektron açqıçı bulaçaq. Ul sotsial' qartadan ğibarät. RFnıñ küp kenä subyektlarında, şul isäptän Başqortstanda anı qullanılışqa kertü uñışlı bara. Respublikada şundıy 150 meñ qarta tapşırılğan.
V.Putin kiñäşmädä qatnaşuçılarğa aña Ufada sälämätlek saqlaw ölkäsendä häm transportta sotsial' qartanıñ eşläw proektı kürsätelüen belderde. Ayırım alğanda, 46 nçı polikliniqa misalında meditsinağa kertelgän mäğlümat texnologiäläreneñ kiñ spektrı kürsätelde.
Anıñ fikerençä, sotsial' qarta universal' bulırğa, yäğni elektron xezmätlärdän faydalanu mömkin, barlıq serwislarda häm böten territoriädä qullanılırğa tieş. Sotsial' qartalar ber munitsipalitetqa ğına kertelü belän tuqtap qalırğa tieş tügel.
“2009 yılnıñ dekabrendä Xökümät töbäklär häm munitsipalitetlar elektron formatqa küçerergä tieşle töp däwlät xezmätläre isemlegen rasladı. Min töbäk başlıqların bu mäsäläne üz kontrol'lärenä aluın sorıym”, - dip assızıqladı Prem'yer-ministr.