Başqortstannıñ Baltaç rayonında ğarmun bäyräme ütte

8 Fevral' 2010 г., 13:16

(Ufa, 8 fevral', “Tatar-inform”, Fänis Fätxullin). Başqortstanda bıyılğı ğarmun bäyrämnäre başlanıp kitte. “Uynağız, ğarmunnar!” isemle täwge şundıy matur tantanalar küpçelek xalqın tatarlar täşkil itkän Baltaç rayonında bulıp ütte.
Bu bäyräm Baltaç töbägendä dürtençe yıl uzdırıla inde. Bıyıl anı cır-moñğa mökibbän xalıq yäşägän Kömyazı awılında oyıştırdılar. Konkurs bıyılğı zur waqiğağa – Böek Ciñüneñ 65 yıllığına bağışlandı. Bäygedä rayonnıñ altmıştan artıq talant iäse qatnaştı häm üz ostalıqların kürsätte.
Bäyräm Başqortstannıñ atqazanğan mädäniät eşleklese Änisä Xäyrullina başqaruında “Uyna, dustım ğarmunıñnı!” tatar xalıq cırı belän başlanıp kitte.
“Ğarmunım yaudağı yuldaşım” nominatsiäsendä Nörkä awılınnan kilgän veteran Mullaxan İslamgaliev belän Tibel awılınnan aqsaqal Şäymöxämät Murzin ciñep çıqtı. Alar ikäwläp iñ yaratqan köylären özderep uynap, jyurinıñ yuğarı bäyäsen aldı.
İske Yaxşıy awılınnan kilgän 72 yäşlek Miñnemulla Ğayfullin isä tal'yan ğarmunda iskitkeç matur uynap, “İñ moñlı uynawçı” nominatsiäsendä ciñde. Östäwenä, skripkada da ğacäyep matur uynıy ikän äle ul!
Köndäşle awılınnan Xänif Wäisow konkursnıñ 1нче däräcä diplomı belän büläklände. Ä Qarğalı awılınnan İndus Äxmätcanow belän Kömyazı awılınnan Radik Usmanov ikençe däräcä diplomğa layık buldılar. Öçençe däräcä diplom Ştände awılınnan Danil Cihangirow öleşenä töşte.
Bayançılar ansambl'läre arasınnan Köndäşle awılı häwäskärläre berençe urınnı yauladı. Tuşqır belän Asavqa awılları ğarmunçıları ikençe urınnı alıp şatlıq kiçerde. Ä Yäntimer awılı talantlarına öçençe urın diplomı tapşırıldı. Sänğat bäygesendä ciñüçelärne Baltaç rayonı xaqime Räfil Gallämov cılı qotladı häm büläklärne tapşırdı.