“Sozvezdie–Yoldızlıq” festivalendä ŞXO illärennän yäş talantlar da qatnaşa

5 Fevral' 2010 г., 18:20

(Qazan, 5 fevral', “Tatar–inform”). “Sozvezdie–Yoldızlıq” X Respubliqa estrada sänğate televizion yäşlär festivaleneñ zona turları 15 fevral'dä başlana. Başta kastinglar Qazanda, annarı Aznaqay, Zäy, Çallı, Çirmeşän, Teläçe, Apas häm Yäşel Üzändä uzaçaq.
Rossiä töbäkläre häm BDB illärennän festival'dä qatnaşırğa teläk beldergän yäş talantlarnı alar cibärgän videomateriallar nigezendä saylap alaçaqlar. Xäzerge waqıtta festival'neñ oyıştıru komitetına Mäskäw, Ästerxan, Amurdağı Komsomol'sk, Sudaq şähäre (Qırım), Ufa, Yoşqar–Ola häm Voljskidan icat kollektivları häm ayırım başqaruçılardan 30 ğariza kilgän. Bu xaqta TR Mädäniät ministrlığınıñ matbuğat xezmätennän xäbär ittelär.
Konkurs “Vokal–solo”, “Vokal' ansambl'lär”, “Xoreografiä”, “Konferans”, “Cırğa iñ yaxşı muzıqa”, “İñ yaxşı cır tekstı”, “Wideoqlip” nominatsiälärendä uza.
Bıyılğı fevtival' Böek Watan suğışında Ciñüneñ 65 yıllığına bağışlap ütkärelä. Festival' şartları nigezendä, konkursta qatnaşuçılar, traditsion programmadan tış, älege datağa bağışlanğan äsärlär dä başqarırğa tieş.
Festival'dä Şanxay xezmättäşlek oyışması illäre – Qazaqstan, Qıtay, Qırğızstan, Tacikstan, Üzbäkstannan, şulay uq Şanxay xezmättäşlek oyışması küzätüçe illäre – İran, Hindstan häm Mongoliädän kilgän yäş artistlar qunaq bularaq qatnaşaçaq. İskärtep uzabız, mondıy kileşülär Tatarstan Mädäniät ministrlığı häm Xalıqara oyışma sekretariatı arasında Qazanda uzğan yılnıñ aprel' ayında Şanxay xezmättäşlek oyışması illäre mädäniät ministrları oçraşuı waqıtında tözelgän ide.
Festival'neñ superfinalı Qazanda uzaçaq. “Sozvezdie–Yoldızlıq” festivaleneñ final ğala–konsertı 30 aprel'dä “Paramida” mädäni–küñel açu üzägendä ütä.
“Sozvezdie–Yoldızlıq” – zamança estrada sänğate ölkäsendä respubliqa külämendäge zur festival' xäräkäte. Festival' Tatarstan Respublikası Prezidentı ximayäsendä häm Ayrat Xäyrullinnıñ Xäyriä fondı yärdämendä uza.
Festival'dä 5 yäştän alıp 21 yäşkä qadärge yäş talantlar qatnaşa. 2001–2009 yıllarda uzğan saylap alu turlarında 600 meñnän artıq keşe qatnaştı. Festival'dä qatnaşuçılarnıñ sanı yıl sayın 20–30 protsentqa arta. Misal öçen, 2009 yılda finalda ğına da 2500 dän artıq konkursant çığış yasadı.
Festival'dä ciñüçelärgä maxsus däwlät stipendiäläre tapşırıla. İñ yaxşı pedagoglarğa TR Prezidentı tarafınnan “Tatarstan Respublikasınıñ atqazanğan mädäniät xezmätkäre” digän maqtawlı isem, ä munitspal' berämlek başlıqları tarafınnan fatirlar birelä.
“Sozvezdie–Yoldızlıq” festivale 2007 yılda M.Cälil isemendäge Respubliqa premiäse laureatı buldı, 2006 yılda “Zur sigezlek” illäre başlıqları oçraşuı qısalarında Rossiäneñ iñ yaxşı 40 proektı arasına kerde, şulay uq 24 laureatqa RATİ–GİTİSta uqu mömkinlege birelde.