Sänäğät häm säwdä ministrlıygında Finlyandiä belän xezmättäşlek prespektivaları tikşerelde

5 Fevral' 2010 г., 15:14

(Qazan, 5 fevral', “Tatar–inform”). TR Sänäğät häm säwdä ministrlıygında säwdä–iqtisadi xezmättäşlek buyınça Tatarstan–Finlyandiä eşçe törkemeneñ 8 nçe utırışı uzdı. Yaklar ike yaklı elemtälär ölkäsendäge täcribä häm perspektivalar xaqında fiker alıştılar.
Eşçe törkemneñ räistäşläre – TR sänäğät häm säwdä ministrlığınıñ berençe urınbasarı Vladimir Solov'yev häm Finlyandiä Mäşğul'lek häm iqtisadi üseş ministrlığı departamentı citäkçese Xenrik Ryayxya. Utırışta Tatarstan häm Finlyandiä ministrlıq, oyışma, kompaniäläre wäkilläre qatnaştı.
Utırışnı açıp, Vladimir Solov'yev Tatarstan–Finlyandiä investitsiä forumı Finlyandiä häm Tatarstan eşlekle dairäläreneñ iktisadnıñ törle ölkälärendä xezmättäşlekne üsterü belän qızıqsınuın kürsätte, dip bilgeläp ütte. Xezmättäşlek turında berniçä kileşü häm memorandum imzalandı. “Bu bezne bik quandıra, çönki bu eşebezneñ real', sizelerlek näticäse”, – dip assızıqladı V.Solov'yev.
Ryayxya äfände, üz çiratında, cılı qabul itkännäre häm vizitnıñ näticäle programması öçen räxmät belderde.
Utırış barışında Tatarstan Respublikası häm Finlyandiä Respublikası predpriätie–oyışmaları arasındağı xezmättäşlekneñ perspektivalı yunäleşläre xaqında fiker alışındı. Tatarstanda bergäläp ğamälgä aşıru öçen berniçä proekt täqdim itelde.
Laxti parkı innovatsiä–texnologiä proektları citäkçese Salem Banafa Tatarstanda ekologiä häm energiä saqlaw ölkäsendäge proektlarnı ğamälgä aşıru buyınça plannarı xaqında söyläde. Ul respubliqa xalqın alğa taba cıyu, transportirovkalau häm eşkärtüne oyıştıru maqsatınnan könküreş qaldıqları belän “ekologiäle” eş itärgä öyrätü programmasın bergäläp eşlärgä täqdim itte.
«European Batteries Oy» kompaniäse direktorlar sovetı räise Eero Nuutinen Tatarstanda elektr transportı öçen litiylı akkumulyatorlar citeşterüne oyıştıru öçen partnerlar tabarğa niätläwen belderde.
«Consortium Sofi» kompaniäse general' direktorı Erkki Leppyänen «Sofi» kompaniälär törkemen täqdim itte häm 2010 yılnıñ yazında Qazanda partnerlar ezläw häm urtaq biznes buldıru öçen anıñ wäkillege açılaçağı xaqında xäbär itte.
“YUİT Lentek” kompaniäse general' direktorı Markku Uqqola Tatarstanda toraq tözeleşe ölkäsendäge täcribä xaqında söyläde.
Eşçe törkem utırışında şulay uq sälämätlek saqlaw, mäğärif häm mädäniät ölkäsendäge qayber proektlar täqdim itelde.
Fiker alışu barışında utırışta qatnaşuçılar bilgeläp ütkänçä, Qazan–Xel'sinki turı avialiniäsen açu xezmättäşlekneñ kiñäyuenä yärdäm itärgä mömkin.
Utırışqa näticä yasap, TR sänäğät häm säwdä ministrınıñ berençe urınbasarı Vladimir Solov'yev bügenge utırışta häm kiçäge oçraşularda yañğırağan xezmättäşlek turındağı täqdimnär alğa taba tikşerü häm ğamälgä aşıru öçen berketmägä kerteläçäk, dip bilgeläp ütte. Bu xaqta TR Sänäğät häm säwdä ministrlığınıñ matbuğat xezmäte xäbär itä.