Tatarstannıñ mäğärif häm fän ministrı “Sälät” xäräkätenä mäxäbbäten añlattı

5 Fevral' 2010 г., 14:12

(Qazan, 5 fevral', «Tatar-inform», Kristina İvanova). Bügen Qazanda “Sälät” yäşlär ictimaği xäräkäteneñ 15 yıllığına bağışlanğan bäyräm çarası uzdı.
Bäyräm köne Tatarstannıñ Fännär akademiäsendä “Sälät”: kiçä, bügen, irtägä” dip atalğan fänni-ğamäli konferensiädän başlandı. Sälätlelärgä qunaqqa Tatarstan mäğärif häm fän ministrı Al'bert Gıyyl'metdinov, TR yäşlär eşläre, sport häm turistlıq ministrı Marat Bariev, respubliqa Däwlät Sovetınıñ mädäniät, fän, mäğärif häm milli mäs'älälär komitetı başlığı Razil Wäliew, Rossiä Däwlät Duması deputatı Viktoriä Çerkesowa häm başqa räsmi zatlar kilgän ide. Qunaqlar başta “Sälät” kürgäzmäsendäge fotografiälär, videomateriallar häm kartinalar belän tanıştı, ä annarı plenar utırış buldı.
Marat Bariev jurnalistlarğa birgän interv'yusında talantlı yäşlärne ezläw häm alarnı üsterü öçen şartlar tudıru buyınça “Sälät” başqara torğan eşlär ähämiätkä iä, dip belderde. “Sälät” - ul ber yaktan, talantlı balalarnı berläşterä, alarnı üsterü öçen şartlar tudıra, ä ikençe yaktan - liderlıq sıyfatları tärbiäli”, - dip assızıqladı ministr.
Marat Bariev “Sälät” yäşläreneñ fän ölkäsendäge uñışların bilgeläp ütte. Bu xäräkätneñ 30 qatnaşuçı kandidatlıq dissertatsiälären yaklağan, liderlıq ölkäsendä sälätlelär “XXI ğasır liderı” bötenrossiä konkursı qısalarında öç tapqır ciñügä ireşkän. “Älbättä, mondıy xäräkätlärgä üseş alırğa yärdäm itärgä kiräk”, - dip ışana “Sälät” popeçitel'lek sovetı başlığı. Marat Bariev Tatarstanda “Seliger” kebek yäşlär forumı oyıştıru ideyäse 100 protsentqa mömkin eş, dip belderde.
TR Fännär akademiäse prezidentı Äxmät Mazgarov üz çığışında “Sälät”: kiçä, bügen, irtägä” dip atalğan fänni-ğamäli konferensiäse - Qazanda Fän atnalığı açqan respublikanıñ fänni bergälege öçen zur waqiğa dip bilgeläp ütte. “Sälät” Tatarstannıñ talantlı yäşlären ezläp taba, äzerli häm üseş alırğa yärdäm itä torğan ğomumi sistema, dip belderde TR Fännär akademiäse başlığı.
TR mäğärif häm fän ministrı Al'bert Gıyyl'metdinov Tatarstanda eşlänelä torğan 2010-2015 yıllarda mäğärifne üsterü buyınça prezident strategiäse turında söyläde, anda “Talantlı yäşlärgä yärdäm itü” ayırım yunäleş bulıp tora. Mäğärif häm fän ministrı fikerençä, teläsä qaysı ilneñ töp baylığı -– anıñ talantları. Al'bert Gıyyl'metdinov talantlı yäşlärgä yärdäm itä torğan “Sälät” xäräkätenä mäxäbbäten añlattı. “Min Tatarstanda “Sälät” kebek xäräkät buluına şat”, - dip belderde ul.
Yubiley çaraları kiç belän “Uniks”ta bäyräm konsertı belän däwam itäçäk. Anda respublikanıñ aldınğı icat kollektivları qatnaşaçaq, cırça Dilärä Wahapowa, bitbokser Mitya Burmistrov, KVN komandaları h.b. çığış yasayaçaq.