Salawat Fätxetdinownı Başqortstanda da tanıdılar

5 Fevral' 2010 г., 12:21

(Ufa, 5 fevral', “Tatar-inform”, Fänis Fätxullin). Kürenekle cırçı, Rossiäneñ atqazanğan häm Tatarstannıñ xalıq artistı Salawat Fätxetdinowqa “Başqortstan Respublikasınıñ atqazanğan artistı” digän maqtawlı isem birelde. Bu xaqta Başqortstan prezidentı Mortaza Räximownıñ färmanı dönya kürde.
Salawat Fätxetdinow, Başqortstannıñ Täteşle rayonında tuıp üsep, cırçı bularaq iñ başta Tatarstanda tanıldı. Başqortstannan çıqqan başqa bik küp talantlı tatarlar kebek ük, ğomum tatar mädäniäten häm sänğaten üsterügä zur öleş kertte häm äle dä, sänğat'tä genä tügel, ä cämäğätçelek eşlärendä dä bik küp igelekle ğamällär başqara ul.
Salawat Fätxetdinow Başqortstandağı tatar häm başqort sänğat ostaları belän dä tığız bäyläneştä, icadi xezmättäşlektä yäşi. “Kärwansaray” başqort estrada törkeme belän anı ozaq yıllar inde dustanä mönäsäbätlär bäyli. Tanılğan yaktaşıbıznı Başqortstanda härçaq kötep alalar, anıñ konsertlarında ber genä buş urın da qalmıy. “Başqortstan Respublikasınıñ atqazanğan artistı” digän maqtawlı isemgä bik tä layık ul.