Ufada tatar rässamı kürgäzmäse açıldı

5 Fevral' 2010 г., 11:19

(Ufa, 5 fevral', “Tatar-inform”, Fänis Fätxullin). Başqortstannıñ Milli muzeenda tatar rässamı Rinat Äxmätownıñ çirattağı şäxsi kürgäzmäse açıldı. “Güzäl respublikam” dip atalğan şuşı kürgäzmägä avtor üzeneñ qırıqqa yaqın kartinasın quyğan.
Talantlı rässamnıñ bu eşläre tulısınça güzäl tabiğat küreneşlärennän tora. İskitkeç matur urmannar, tawlar, yılğa-küllär, kiñ basu-qırlar surätlängän alarda. Açıq yäşel, zäñgär, sarı töslär balqışı uynıy kartinalarda. “Min, äsärläremä syujetlar tabu öçen, respublikanıñ törle töbäklärendä bulam. Tuğan yağıbız iskitkeç matur, aña qarap soqlanudan tuğan kartinalarnı başqalarğa da täqdim itäse kilep tora”, - di Rinat äfände.
Rinat Äxmätow Başqortstanda soñğı yıllarda iñ cimeşle icat itüçe peyzaj ostalarınñ berse. Anıñ iskitkeç matur eşläre M. Nesterov isemendäge Başqortstan däwlät muzeenda, Ufa “Sänğat” galereyase fondlarında saqlana. Şulay uq talant iäseneñ küp kartinaların dönyanıñ törle illärendä yäşäwçe şäxsi kolleksionerlar da satıp alğan.
Rinat äfände, rässamlıq belän bergä, üze dä balalarğa surät töşerü serlären öyrätä. Menä berniçä yıl inde üze oyıştarğan studiädä räsem sänğate neçkäleklären töşenderä ul balalarğa.