Al'bert Gıyyl'metdinov: “Mäğäriftä problemalar üzäge – uqıtuçı qulında”

5 Fevral' 2010 г., 09:16

(Qazan, 5 fevral', “Tatar–inform”, Kristina İvanova). Sıyfatlı belem birü sisteması buldıruda uqıtuçınıñ role başqa faktorlarğa qarağanda möhimräk. Kiçä Tatarstan mäğärif häm fän ministrı Al'bert Gıyyl'metdinov respublikanıñ matematiqa uqıtuçıları internet–forumı saytında urnaştırılğan wideomöräcäğätendä änä şulay dip belderde.
Üzeneñ wideoçığışında Tatarstan mäğärif häm fän ministrı 2010–2015 yıllarğa isäplängän respubliqa belem birü sistemasın üsterüdä Prezident strategiäsen eşläw xaqında söyläde. A.Gıyyl'metdinov xäbär itkänçä, yaqın könnärdä älege strategiä kiñ cämäğätçelek xökemenä tapşırılaçaq. “Strategiä mäğärifneñ barlıq däräcälären (yäslelärdän alıp vuzdan soñ belem aluğa qadär) qolaçlıy. Bu dokumentta Tatarstanda belem birüneñ sıyfatın arttırırğa mömkinlek biräçäk qararlar tabılır dip ışanabız”, – dip belderde ministr.
A.Gıyyl'metdinov xäbär itkänçä, Tatarstanda strategiäne eşlär aldınnan kiñ qolaçlı sotsiologik tikşerenülär ütkärelgän. “Bu bezgä xalıqnıñ respublikanıñ bügenge belem birü sisteması xaqında nilär uylawın, nindi problemalar barlığın, närsägä omtılırğa kiräklegen añlarğa mömkinlek birde. Dürt kategoriägä qarağan grajdannar – uquçılar, uqıtuçılar, ata–analar häm eş birüçelär arasında soraştıru ütkärelde. Xäzerge waqıtta bez näticälärgä analiz yasawnı tögällibez”, – dip söyläde ministr.
TR mäğärif häm fän ministrı beldergänçä, strategiäneñ töp ideyäse ğadi – sıyfatlı belem birü sisteması buldıruda uqıtuçınıñ role başqa faktorlarğa qarağanda möhimräk. “Mäğäriftä problemalar üzäge – uqıtuçı qulında. Respublikada köçle pedagogik korpusnıñ buluı möhim. Bezdä talantlı uqıtuçılar küp. Ämma, qızğanıçqa kürä, alarnıñ barısı da tormış üze quyğan bügenge kön taläplären qanäğätländermi. Şunlıqtan strategiäne ğamälgä aşıru qısalarında pedagogik kadrlarnı äzerläw häm yañadan äzerläw buyınça zur eş başqarılaçaq”, – dip xäbär itte ul.