M.Şäymiew: “R.Miñnexanownı maqsatçanlıq, xucalıqnı bik yaxşı alıp baru säläte bizi”

4 Fevral' 2010 г., 16:32

(Qazan, 4 fevral', “Tatar-inform”, Aygöl Fäxretdinowa). Mintimer Şäymiew üzeneñ bişençe srokqa barudan baş tartuınıñ küptän uylanğan buluına basım yasap, uzğan srokqa da ul waqıttağı Prezident Vladimir Putin üteneçen istä totıp qına riza bulğanlığın assızıqladı.
Anıñ citäkçelektän kitü teläge matbuğatta zur yañğıraş tudırğan ikän, bu respublikağa pozitiv bäya, dimäk, eş tieşençä alıp barılğan, dip sanıy ul.
“Bar äyber çağıştıruda belenä. Bu çorda eşlekle citäkçelär komandası belän bergäläp küp närsälärgä ireşä aldıq. Konfessiä, millätara tatulıq monıñ ber ürnäge”, - di ul. Ul Xökümät başlığı bularaq, Röstäm Miñnexanow adresına barı maqtaw süzlären genä citkerde. “Qatlawlı yıllarda xaqimiät başlığı, finans ministrı. Xökümät citäkçese bulıp eşläw aña küp närsä birde, tağın da yaxşıraq eşlärgä yunäleş kürsätte”, -dip assızıqladı Prezident.
“RF Prezidentı Tatarstanda äzerlekle kadrlar pleyadası buluın iskärtä kilä. Bu cawaplı wazifağa şular arasınnan Röstäm Miñnexanownıñ täqdim itelüen bik döres dip sanıym”, -di Mintimer Şäymiew. Anıñ fikerençä, idarä itüdä tuplanğan yaxşı täcribä, idaräneñ zamança ısulların kertü yaña citäkçegä eşen alıp barırğa yärdäm itäçäk. Mintimer Şäymiew beldergänçä, maqsatçanlıq, añlaw, xucalıqnı bik yaxşı alıp baru säläte – Röstäm Miñnexanownı citäkçelektäge änä şul sıyfatlar bizi. “Säyäsät - iktisadnıñ konsentratsiälängän çağılışı. Bügenge säyäsätçedän sotsial' häm iqtisadi yunäleşne berdäy alıp baru säläte sorala. Qalğanın tormış üze öyrätä. Röstäm Miñnexanow moña sälätle buluın raslap kilä”, -dip belderde Mintimer Şäymiew.
Ğamäldäge Prezident varisına üzeneñ nakazların da yulladı. “Milli mäs'älä, respublikada yäşäwçe xalıqlarnıñ tellären häm traditsiälären saqlaw- yaña Prezident änä şuşı mäsälälärneñ möhimlegen añlap eşlärgä tieş. Respublikada tatulıqnı barı anıñ küp millätle xalıq mänfäğäten yaklaw aşa ğına ireşep bula”, -dip belderde Mintimer Şäymiew. Anıñ fikerençä, Prezident wazifası ul -köçle xarakterlı, maqsatçan, xalqına xezmät itärgä äzer bulğan keşelär yazmışı.