Fin eşquarları “Texopark”, “Kazanorgsintez” häm yaña toraq kompleks belän tanıştı

4 Fevral' 2010 г., 15:31

(Qazan, 4 fevral', “Tatar–inform”). Bügen Finlyandiä Respublikası räsmi delegatsiäse äğzaları, Qazanğa ike könlek vizit qısalarında respublikanıñ berniçä predpriätiesendä, şul isäptän “Ximgrad” texnopolisı, “Kazanorgsintez” AAC, şulay uq Qazandağı YUİT fin firması tözi torğan toraq kompleksta buldı. Delegatsiäne Tatarstan Respublikası Prem'yer–ministrınıñ berençe urınbasarı Boris Pavlov ozatıp yörde, dip xäbär itä TR Ministrlar Kabinetınıñ matbuğat xezmäte.
“Ximgrad” texnopolisı idaräçese Al'bert Kärimow delegatsiädä qatnaşuçılarğa texnopolisnıñ eşçänlege xaqında söyläde. “Ximgrad” – üz territoriäsendä ximiä häm polimer produksiä eşkärtü ölkäsendä keçe häm urta kompaniälärne urnaştıru öçen bilgelängän zamança industrial' kompleks. Xäzerge waqıtta anıñ territoriäsendä 200 dän artıq kompaniä urnaşqan. “Ximgrad”nıñ töp burıçlarınnan berse – alarnıñ uñışlı startı häm üseşe öçen tieşle şartlar buldıru”, – dide ul.
“Kazanorgsintez” AAC general' direktorı Leonid Alexin delegatsiä äğzalarına predpriätieneñ xäle häm üseş perspektivaları xaqında söyläde. “Uzğan yıl predpriätie tarafınnan 410 meñ tonna etilen citeşterelde häm 0,5 million tonnadan artıq polietilen satıldı. Şulay uq 203 meñ tonna yuğarı basımlı polietilen, 321 tonna tübän basımlı polietilen eşläp çığarıldı, produksiäneñ yaña törläre – polikarbonat, buten–1 häm uglerod dioksidı citeşterelä başladı. “Kazanorgsintez” AAC produksiäsen, nigezdä, Uqraina, Finlyandiä, Qıtay, Törkiä, Belarus' häm Qazaqstan satıp ala. Tulayım alğanda, dönyanıñ 30 ile, şul isäptän BDB sostavına kerüçe barlıq däwlätlär belän produksiä cibärü buyınça kileşülär tözelgän”, – dide ul.
Boris Pavlov delegatsiä äğzalarına “Kazanorgsintez” AAC bazasında bik tä qızıqlı proektnıñ ğamälgä aşırıluı xaqında söyläde. Süz zamança kompozit materiallarnıñ möhim elementı – “polietilenplastik” süs xaqında bara.
Boris Pavlov şulay uq “Tatarstan Respublikası misalında az urmanlı töbäklärneñ tübän tawarlıqlı üzağaçın komplekslı faydalanu” proektın täqdim itte, ul Finlyandiä delegatsiäse wäkillärendä zur qızıqsınu uyattı. Yaklar tarafınnan şulay uq älege häm alarnı qızıqsındırğan başqa proektlarnı 2010 yılnıñ ikençe yärtıyıllığında uzaçaq oçraşuda qaraw turında kileşü tözelde.
Räsmi vizit axırında Finlyandiä Respublikası delegatsiäse Qazandağı YUİT fin firması tözi torğan toraq kompleksta buldı. Kompaniä aktivında – Qazan Kremle ansamble, Sport sarayı, Qazan ratuşası kebek obyektlarda podryad eşläre. “YUİT DOM” säwdä markasınıñ general' direktorı Yaaqqo Toyvonen fin arxitektorları tarafınnan başqarılğan “Sovremennik” toraq kompleksı proektın täqdim itte.
“Sovremennik” toraq kompleksı 9–25 qatlı biş yorttan häm öç parkingtan ğibarät. Ul Yaña Savin rayonında Qazansu yılğasınıñ uñ yarında urnaşqan. Xäzerge waqıtta YUİtnıñ “Lentek” filialı kompleksnıñ berençe çiratın – dürt seksiäle yortnı tözü häm satu eşlären alıp bara.
İke könlek vizitqa näticä yasaw barışında Finlyandiä delegatsiäse wäkilläre respubliqa Xökümäte alıp bara torğan eşne yuğarı bäyäläde häm näticäle xezmättäşlekneñ alğa taba da däwam itäçägenä ömet belderde.