“QAMAZ” AAC general' direktorı Sergey Kogogin “Rossiä–2010” forumında çığış yasadı

4 Fevral' 2010 г., 14:30

(Çallı, 4 fevral', “Tatar–inform”). Bügen “QAMAZ” AAC general' direktorı Sergey Kogogin Mäskäwdä uzuçı “Rossiä–2010” Xalıqara forumında çığış yasadı.
“QAMAZ” general' direktorı (ul şulay uq “Rossiä avtomobil' citeşterüçelär berläşmäse” Kommersiäle bulmağan partnerlığı sovetı räise wazifasın başqara häm ilneñ başqa avtomobil' citeşterüçeläre Direktorlar sovetı sostavına kerä) “Rossiä avtomobil' sänäğäte: çit il täcribäsen qullanıp” digän isem astında uzğan sessiädä qatnaştı. Ul Rossiä avtomobil' sänäğäte predpriätieläreneñ dönya avtomobil' industriäsenä integratsiälänüeneñ barışı xaqında söyläde, älege protsessnı obyektiv häm Rossiä iqtisadı aldında torğan burıçlarğa bäyle dip bäyäläde. İnnovatsiälär, yuğarı texnologiäle produksiä citeşterügä nigezlängän küpyäklı modernizatsiä aña dönya bazarında köndäşlekkä sälätle bulırğa mömkinlek biräçäk. Bu – qatlawlı häm citdi investitsiälär kertüne taläp itüçe burıç, ul barı tik anı däwlät däräcäsendä ğamälgä aşırğanda ğına xäl itelä ala.
Üz çığışında Sergey Kogogin “QAMAZ”nıñ krizisqa qarşı programması, yök avtomobil'läre häm alarğa komponentlar citeşterüçe dönyanıñ äydäp baruçı predpriätieläre belän partnerlıq mönäsäbätläre praktikası, kompaniäneñ töp investitsiä proektları häm anıñ biznesın diversifikatsiäläüdäge täcribäsenä iğtibar yunältte. Anıñ bilgeläp ütüençä, “QAMAZ” üz aldına zur burıç quya. Monıñ öçen kompaniä yaqındağı unyellıqta yök avtomobil'läreneñ ör–yaña model' rätenä küçärgä häm kompaniäneñ bazarda tulısınça caylaşuına ireşergä tieş.
Bu “QAMAZ” AACneñ 2009 yılnıñ dekabrendä qabul itelgän, 2018 yılğa qadär östenlekle maqsatlarnı çağıldırğan, 2013 yılğa qadärge strategik üseş programmasında qaralğan. Sergey Kogogin şulay uq xäzerge waqıtta eşlänä torğan 2020 yılğa qadär Rossiä avtomobil' sänäğäten üsterü programmasınıñ töp nigezlämäläre xaqında da söyläde, dip xäbär itä predpriätieneñ räsmi saytı.