Röstäm Miñnexanowqa TR Prezidentı wäqälätläre birelde

4 Fevral' 2010 г., 12:51

(Qazan, 4 fevral', “Tatar-inform”, Aygöl Fäxretdinowa). TR Däwlät Sovetınıñ bügen uzğan çirattan tış utırışında Röstäm Miñnexanowqa TR Prezidentı wäqälätläre birelde. Utırışta qatnaşqan 94 deputatnıñ barısı da RF Prezidentı parlament qarawına kertkän bu kandidaturanı bertawıştan xupladı.
Röstäm Miñnexanow 1978 yılda Qazan awıl xucalığı universitetın, 1986 yılda Sovet säwdäseneñ çittän torıp uqu institutın tämamlıy, iqtisad fännäre doktorı. Xezmät yulın ul institutnı tämämlağaç, 1978 yılda Tatarstannıñ Saba rayonınıñ “Sel'xoztexniqa” rayon berläşmäseneñ injener-diagnostı bulıp başlap cibärä. 1980-1983 yıllarda - Saba urman xucalığınıñ ölkän injener-energetiğı, baş energetiğı. 1983-1985 yıllarda Saba rayon qullanuçılar berläşmäseneñ säwdä buyınça idaräsendä räis urınbasarı, 1985-1990 yıllarda Arça rayon qullanuçılar berläşmäse idaräse räise, 1990-1992 yıllarda TASSR xalıq deputatlarınıñ Arça rayon Sovetı başqarma komitetı räise, 1992-1993 yıllarda Arça rayonı xaqimiäte başlığınıñ berençe urınbasarı bulıp eşli. 1993-1996 yıllarda TR xalıq deputatlarınıñ Biektaw rayonı Sovetı räise - TR Biektaw rayonı xaqimiäte başlığı. 1996-1998 yıllarda TR finans ministrı, 1998 yılnıñ 10 iyulennän bügengä qadär TR Prem'yer-ministrı.
TR ğamäldäge Prezidentı Mintimer Şäymiew kandidatka ışanıç beldergän öçen deputatlarğa räxmät belderde. Ul, üz çiratında, törle formalarda respublikanıñ yaña başlığına yärdäm itäçägen ışandırdı.
Röstäm Miñnexanow üzenä ışanıç beldergän öçen deputatlarğa räxmät süzlären citkerde. Ä iñ olı häm cılı räxmäten ul eşkä häm tormışqa öyrätkän ostazı, kiñäşçese Mintimer Şäymiewkä yulladı häm ışanıçnı aqlarğa süz birde.
Parlament räise Färit Möxämmätşin bügenge utırışnı parlament divarlarında moñarçı bulmağan waqiğa dip bäyäläp, yaña traditsiägä nigez salınunı assızıqladı. Şul räweşle, xaqimiät ğamäldäge Prezidenttan sivilizatsiäle yul belän yaña citäkçegä tapşırıldı. Mintimer Şäymiew parlament utırışlarında daimi qatnaşıp kilde. Däwlät Sovetı räise Röstäm Miñnexanownı bu traditsiägä tuğrılıqlı qalırğa çaqırdı. Deputatlar korpusı, üz çiratında, anıñ bar ölkädäge başlanğıçlarına, initsiativalarına yärdäm itäçäklären ışandırdı. “Respubliqa äle bik ozaq Şäymiew epoxası belän yäşäyäçäk. Tatarstannıñ yaña tarixı uzğan ğasırnıñ distä yılı, bu ğasırnıñ 10 yılı anıñ iseme belän bäyle”, - di Färit Möxämmätşin. Ul yaña tarixta TR parlamentınıñ berençe citäkçese, TR berençe Prezidentı öçen TR Däwlät Sovetı utırışlar zalında daimi urın buldırıluın xäbär itte. Monnan tış, TR Däwlät Sovetı Prezidiumınıñ Mintimer Şäymiewkä “Tatarstan aldındağı qazanışları öçen” ordenın birü täqdime belän çığaçağın citkerde.
Ğamäldäge Prezidentnıñ wäqälätläre 25 martta tämamlana. Aña qadär Mintimer Şäymiew Prezident wazifasında qalaçaq. Ä Prezident wäqälätläre birelgän Röstäm Miñnexanow ul waqıtqa qadär Prem'yer-ministr wazifasın ütäwne däwam itäçäk. Tatarstannıñ yaña Prezidentı inauguratsiäse 25 martqa bilgelängän.