G.Rapota: “R.Miñnexanow M.Şäymiew tuplağan komanda wäkile, ul TR üseşenä zur öleş kertte”

4 Fevral' 2010 г., 11:19

(Qazan, 4 fevral', “Tatar-inform”, Aygöl Fäxretdinowa). Bu minutlarda dürtençe çaqırılış TR Däwlät Sovetınıñ 8 nçe çirattan tış utırışı uza. Anda 94 deputat qatnaşa. Kön tärtibenä barı ber mäs'älä çığarılğan. Ul Röstäm Miñnexanowqa TR Prezidentı wäqälätlären birü. Utırış eşendä RF Prezidentınıñ İdel buyı federal' okrugıyndagı wäqälätle wäkile Grigoriy Rapota, anıñ urınbasarı Leonid İl'çenko, TR Prezidentı Mintimer Şäymiew, TR Yuğarı, Konstitutsiä sudları räisläre, TR Prokurorı, Tatarstannıñ RF Federatsiä Sovetıyndağı äğzaları, Tatarstannan saylanğan RF Däwlät Duması deputatları, predpriätie-oyışma, yuğarı uqu yortları citäkçeläre h.b. qatnaşa. Utırışnı tele-radio translyatsiädän küzätergä bula. Translyatsiä “Tatar-inform” mäğlümat agentlığı saytında da oyıştırılğan.
Bilgele bulğança, uzğan atnada RF Prezidentı Dmitriy Medvedev Röstäm Miñnexanow kandidaturasın aña TR Prezidentı wäqälätlären birü öçen TR Däwlät Sovetı qarawına kertkän ide. Zakon buyınça parlament kandidatura buyınça fikerlär tuplaw öçen 10 könlek pauza alırğa xoquqlı. Läkin Tatarstan parlamentariyları ozaq uylap torunı kiräk tapmadı. Bügen utırış aldınnan Prezidentlıykqa kandidat buyınça fiker alışular parlament komitetları, fraksiä utırışlarında uzdı.
Utırışta iñ berençe bulıp süzne RF Prezidentınıñ wäqälätle wäkile Grigoriy Rapota aldı. “Mintimer Şäymiew Medvedevqa kiläse srokqa Prezidentlıykqa üz kandidaturasın qaramawnı sorap möräcäğät itkäç, min yuğalıp qalğan idem. Rossiänen säyäsi landşaftın annan başqa küzallaw mömkin tügel bit. Tatarstan annan başqa niçek yäşär digän soraw da borçıdı. Läkin barıbız da säyäsätçelär bit, añlıybız, tormış däwam itä, üzgäreşlär bara. Şäymiew üze dä bu argumentnı kiterde”, - dip başladı ul süzen.
Wäqälätle wäkil Mintimer Şäymiewneñ il külämendä abruylı säyäsätçe bularaq zur rolenä tuqtalıp, anıñ başqalar öçen ürnäk buluın assızıqladı. “RF Däwlät Sovetı utırışlarında, başqa cıyınnarda Şäymiew söyli başlawğa başqalarnıñ iğtibarı barı aña yunälä ide. Bu anıñ ölkän säyäsätçe buluında ğına tügel, qızıqlı, ölgergän, ixlas fikerlär äytüenä dä bäyle. Şul yul belän ul bar keşedä dä ixtiram häm zur qızıqsınu uyata belde”, -di wäqälätle wäkil.
Tatarstanğa kilgändä, Mintimer Şäymiew citäkçelegendä respubliqa zur däwer uzdı, dip sanıy Rapota. “Üzgärtep qoru yıllarınnan alıp, böten Rossiädä alğa taba niçek yäşärbez, digän soraw tudı. Monı üseşneñ normal' ağımına quyar öçen Mintimer Şäripowiç kebek keşelär kiräk buldı. Anıñ uñışın Tatarstannıñ dinamik üseşe raslıy. Ul üz tiräsenä oyıştıru säläte zur bulğan, talantlı komanda tuplıy aldı. Alardan kem respublikanı kiläçäktä citäklärgä sälätle dip isemlek tözelsä, ul isemlek bik zur bulır ide. Röstäm Miñnexanow şul komanda wäkile, Tatarstan üseşenä zur öleş kertüçelärneñ berse. Eşne başqaru säläte zur bulğan bu şäxes, Tatarstanda başqarılğan eşlärne layıklı däwam itüçe bulır, xalıqın yäşäw däräcäsen tağın da kütärergä yärdäm itär”,- dip Rapota deputalarnı Röstäm Miñnexanow kandidaturasın yaklarğa çaqırdı.
TR Däwlät Sovetı räise Färit Möxämmätşin R.Miñnexanow kandidaturasın “Berdäm Rossiä”neñ TR töbäk bülege tarafınnan täğdim itelüen dä iskärtep, Miñnexanownıñ qayda ğına eşlämäsen, üzen osta oyıştıruçı, nätictäle menedjer bularaq kürsätüen assızıqladı. Anıñ fikerençä, ul xäzerge Prezidentnıñ layıklı almaşı bulaçaq.