Röstäm Miñnexanow: “Pensionerlarnıñ yäşäw däräcäsen kütärü öçen küp eş başqarıldı”

4 Fevral' 2010 г., 09:44

(Qazan, 4 fevral', “Tatar–inform”, Liliä Markelova). Rossiä Pensiä fondınıñ TR bülege xezmätkärläre 2009 yılda başqarılğan eşkä näticä yasadı. Kiçä Qazanda uzğan Rossiä Pensiä fondınıñ TR bülege kollegiä utırışında Tatarstan Prem'yer–ministrı Röstäm Miñnexanow qatnaştı.
Uzğan yıl pensiä turındağı zakonnarğa üzgäreşlär kertelde, östäwenä bu qatlawlı iqtisadi şartlarda uzdı. Ämma, Rossiä Pensiä fondınıñ TR bülege idaräçese Marsel' İmamov üz dokladında bilgeläp ütkänçä, bu Rossiä häm Tatarstan Prezidentlarınıñ Yullamalarında iğlan itelgän yöklämälärne, respubliqa Xökümäte başlığı yöklämäsen ütärgä qomaçawlamadı.
“Rossiä Pensiä fondınıñ TR bülege pensiä külämen arttıru häm respubliqa grajdannarına sotsial' yärdäm kürsätü, pensiälärne üz waqıtında tüläw häm yañadan isäpläw, grajdannarnıñ ayırım kategoriälärenä aqçalata tüläwlär başqaru buyınça barlıq çaralarnı tulı külämdä ğamälgä aşırdı. Tatarstanda 1 million 14 meñnän artıq pensionerğa däwlät yöklämäläreneñ barlıq törläre üz waqıtında finanslandı. Respublikada Pensiä fondı tarafınnan tülängän aqçanıñ küläme 70 milliard sum çaması täşkil itte, bu 2008 yılğa qarağanda 15 milliard sumğa artıq”, – dip xäbär itte Marsel' İmamov.
Yıl däwamında pensiälär dürt märtäbä indeksatsiälände. Näticädä, alar urtaça 1543 sumğa (35 protsentqa) arttı. Pensiä fondı orğannarına möräcäğätlär sanı isä kimede. Uzğan yıl Rossiä Pensiä fondınıñ TR bülegenä 985 meñ keşe möräcäğät itte. Bu 2008 yıl belän çağıştırğanda 150 meñgä kimräk.
Grajdannarnıñ möräcäğätläre buyınça uzğan yıl territorial' idarälär 500 meñgä yaqın qarar çığarğan, şul isäptän 79 meñ yaña pensiä bilgelängän. Şularnıñ 99,7 protsentı – 10 könlek srokqa. Bu İdel buyı federal' okrugında iñ yaxşı kürsätkeç.
TR Prem'yer–ministrı Röstäm Miñnexanow bilgeläp ütkänçä, soñğı yıllarda federal' Xökümät pensionerlarnıñ yäşäw däräcäsen kütärü öçen küp närsä eşläde. Monnan tış, xalıqnıñ moxtaclıqta yäşäwçe qatlamnarın yaklawğa yunälderelgän sotsial' yaklaw liniäse buyınça zur programmalar ğamälgä aşırıla.