Ğinwar ayında “QAMAZ” avtomobil'lären satu küläme öç tapqır artqan

3 Fevral' 2010 г., 08:37

(Qazan, 3 fevral', “Tatar–inform”). “QAMAZ” 2010 yılnıñ ğinwarında avtomobil'lär satu külämen 2009 yılnıñ ğinwarı belän çağıştırğanda 60–70 protsentqa – 1,9 maşinağa qadär arttırğan. Şul uq waqıtta irekle bazarda 1,5 meñgä yaqın maşina satılğan – bu uzğan yılnıñ ğinwarına qarağanda öç tapqır kübräk. Bügen kompaniäneñ general' direktorı Sergey Kogogin “Rossiä–2010” investitsiä forumı quluarlarında änä şulay dip belderde.
«İnterfaks» xäbär itkänçä, S.Kogogin süzlärenä qarağanda, bu bazarda soraw artuğa bäyle, däwlät kileşüläre uzğan yılğı däräcädä qalğan – 450 maşina däwlät zakazı buyınça satılğan.
“QAMAZ” başlığı fevral' ayında avtomobil'lär satu küläme artuın däwam itär dip ömetlänä. Anıñ süzlärenä qarağanda, bu atnada kompaniä citäkçelege ere dilerlar belän oçraşqan, alar bazarda soraw artu faktın raslağan.
2009 yıl näticäläre buyınça “QAMAZ” 23,3 meñnän artıq maşina komplektı häm äzer avtomobil'lär cıyğan, 24 meñnän artıq maşina satqan. Sergey Kogogin aldaraq beldergänçä, 2010 yıl näticäläre buyınça avtomobil'lär satu küläme berniqadär artır dip kötelä.