Tatarstanda neft' çığaru küläme arta

3 Fevral' 2010 г., 12:37

(Qazan, 3 fevral', “Tatar–inform”, Änwär Malikov). Tatarstannıñ neft' kompaniäläre 2010 yılnıñ ğinwar ayında 2758,6 meñ tonna “qara altın” çığarğan, bu 2009 yılnıñ ğinwarına qarata 100,8 protsent täşkil itä. Şul isäptän, keçe neft' kompaniäläre 560,7 meñ tonna (üseş – 0,9 protsent) neft' çığarğan, “qara altın” tabuda alarnıñ öleşe 20,3 protsent täşkil itä.
“Tatneft'” AAC ğinwarda 2198 meñ tonna neft' çığarğan, bu 2009 yılnıñ ğinwarına qarata – 100,8, plan kürsätkeçenä qarata 101,9 protsent täşkil itä. “Tatneft'” kompaniälär törkemeneñ Rossiä Federatsiäseneñ başqa töbäklärendäge neft' yatmalarında 23,1 meñ tonna (plannıñ 100,7 protsentı) “qara altın” çığarılğan. Magistral' neft' ütkärgeçlär sistemasına 2154,9 meñ tonna neft' tapşırılğan, şunıñ 50 meñ tonnası – plannan tış.
Ğinwar ayında 57,7 meñ metr (2009 yılnıñ ğinwarında – 57,8 meñ metr) cir borawlanğan, şunıñ 47,6 meñ metrı (uzğan yılnıñ ğinwarında – 51,9 meñ metr) – “Tatneft'” AAC öçen. Şul isäptän, ekspluatatsiä maqsatınnan – 44,9 meñ, razvedqa yasaw maqsatınnan 2,7 meñ metr cir borawlanğan.
Zakazçıylarğa 32 skvajina (2009 yılnıñ ğinwarında – 23) tözep tapşırılğan, şunıñ 11 ye (monnan ber yıl elek – 13) – “Tatneft'” AAC öçen.