TYURKSOY tarafınnan Zäki Wälidi yılı iğlan itelde

2 Fevral' 2010 г., 18:19

(Ufa, 2 fevral', “Tatar-inform”, Fänis Fätxullin). Başqortstan prezidentı Mortaza Räximow bügen Ufağa eş säfärenä kilgän TYURKSOY xalıqara oyışması general' direktorı Düsän Qaseinownı qabul itte häm eşlekle söyläşülär alıp bardı. Oçraşuda Başqortstan Respublikası belän TYURKSOY arasındağı xezmättäşlek mäsäläläre tikşerelde. Şulay uq Oyışmanıñ daimi sovetınıñ çirattağı utırışın ütkärü buyınça fiker alışular buldı.
Söyläşüdä bıyılğı yılnı TYURKSOY illäre qısalarında tanılğan ğalim häm cämäğät eşleklese Äxmätzäki Wälidi yılı bularaq iğlan itü xaqında da kileşende. Bu xaqta bıltır köz aylarında uq aldan söyläşülär bulıp quyğan ide inde. Bıyıl Äxmätzäki Wälidineñ tuuına 120 yıl. Şuşı yubiley Başqortstanda bik zurlap bäyräm iteläçäk. TYURKSOY oyışması da bu çaradan çittä qalmasqa buldı. Zäki Wälidigä bağışlanğan çaralarnı TYURKSOY äğzası bulğan barlıq illärdä dä oyıştıru küzallana. TYURKSOY oyışması general' direktorı Düsän Kaseinov äytüençä, Törkiädä dä bu uñaydan bay programmalı çaralar äzerlänä.
Ufada eşlekle söyläşülär alıp baru belän bergä, Düsän Kaseinov başqalanıñ muzeylarında, teatrlarında, istälekle urınnarında da yöri.