Peterburgta yäşäwçe abruylı millättäşebez yubileen bilgeläde

2 Fevral' 2010 г., 12:47

(Sankt-Peterburg, 2 fevral', “Tatar-inform”, Zäriä Xäsänowa). Şuşı könnärdä Peterburgta yäşäwçe millättäşebez Änwär Säyetbağinğa 60 yäş tuldı. Änwär Rizvan ulı tönyak başqalada bilgele häm abruylı şäxes. Ul RF atqazanğan mädäniät xezmätkäre, pedagogiä fännäre kandidatı, Duslıq, Poçet ordennarı, Sankt - Peterburgnıñ -300, Qazannıñ - 1000 yıllıq istälek medal'läre, RF Prezidentı Räxmät xatı belän büläklängän. Xäzerge waqıtta şähärneñ ike zur - A.M. Ğor'ki isemendäge häm Wıborg mädäniät saraylarına jitäkçelek itä.
Änwär Säyetbağinnıñ yubilee uñayınnan A.M.Ğor'ki isemendäge mädäniät sarayında zur kiçä oyıştırıldı. Kiçäneñ täwge öleşendä Änwär äfändeneñ tormış häm xezmät yulına bağışlanğan kino kürsätelde. Anda Ol'ğa Arosewa, Mixail Derjavin, Oleg Basiaşwili, Yuri Gal'sev, Nina Usatova, Aleksandr Pankratov- Çernıy kebek bilgele artistlar icat kütäreleşlärendä Säyetbağin yärdämen toyuları xaqında cılılıq belän iskä aldı.
Şähärneñ iñ ere V.P. Kapranov isemendäge mädäniät sarayına citäkçelek itkängä qadär Säyetbağin Leningrad ölkäsendäge "mädäniät uçaqlarında" çınığu ala. Şuşı yıllarda tatar-başqort "Çişmä" cämğıäten oyıştıra. 1995 yılda barlıqqa kilgän bu oyışma küp matur eşläre belän tanıla. 2007 yılda ul tatar cämğıäte genä bulıp qaldı. Yuğarı profsoyuz mäktäbendä belem alğan Änwär äfände xalıq belän eşläwneñ böten neçkäleklären belä. Şunlıqtan ul ozaq yıllar mädäniät ölkäsendä tanılu aldı. Anı şähär xaqimiäte dä, ul eşlägän Kirov rayonı citäkçelege dä ixtiram itä. Omsk tatarın yubilee belän qotlarğa şähärneñ Zakonnar çığaru palatasınnan da, rayon xaqimiätennän dä, töbäqära profsoyuz federatsiäsennän dä wäkillär kilgän ide.
Tatarstan Respublikası xalqı häm citäkçelege isemennän yubilyarnı TR Sankt-Peterburg häm Leningrad ölkäsendäge daimi wäkile Şamil Äxmätşin, Sankt-Peterburg gubernatorı Valentina Matvienko häm şähär xaqimiäte qarşındağı mädäniät komitetı isemennän Bötendönya Tatar kongressı äğzası Şamil Akbulatov täbrikläde. Möfti Cäfar Ponçayıwnıñ qotlawı da ixlas häm izge teläklärgä qorılğan ide.
Qotlawlarğa konsert yalğandı. Anı Tatarstannıñ xalıq, RF atqazanğan artistı Al'bert Äsädullin açtı. Ul üz repertuarınnan "Qaq molodı mı bıli" häm "Doroğa bez konsa" äsärlären başqardı. Tatarstannıñ xalıq artistkası Rezeda Ğalimowa operalardan ariälär işetterde. Tamaşaçı inde tuğan teldä ber çığış ta işetälmäbez mikänni, dip küñelsezlängän genä ide. Qazan däwlät konservatoriäsendä belem aluçı Büzdäk yegete Filyus Qahirow bayançı Röstäm Räxmätullin sızdırğan köylärgä quşılıp "Sanduğaç"nı häm "Küñeldä yaz ide" cırların iskitkeç moñlı tawış belän yöräklärgä saldı. Tamaşaçı da alqışlarnı cällämäde. Tatar telen, moñın añlağannar bu kiçtä tağın ber matur "büläk" aldı. A.M. Ğor'ki isemendäge mädäniät sarayı qarşındağı "Ataman" qazaq ansamble xalqıbıznıñ "Kübälägen" saf tatarça cırlap-biep işetterde. Şuşı çığışnı ekranda uynap çapqan törle yaxşı toqımlı atlar bizäde. Bilgele cırçı Sergey Zaxarownı da, "Debyut" balalar ansamble çığışın da tamaşaçı iskitkeç cılı qabul itte. Änwär Säyetbağin bu kiçädä çäçäklärgä kümelde.