Tatarstan ğalimnäre Mäskäwdä fänni qazanışların täqdim itäçäk

2 Fevral' 2010 г., 10:43

(Qazan, 2 fevral', “Tatar–inform”, İrina İgnat'yeva). Tatarstan ğalimnäre Mäskäwdä fänni qazanışların täqdim itäçäk. Tatarstan awıl xucalığı fänni–tikşerenü institutı Mäskäwdä 4–5 fevral' könnärendä uzaçaq agronomiä forumına çaqıru aldı. Bu xaqta “Tatar–inform” agentlığına instituttan xäbär ittelär.
Tatarstan awıl xucalığı fänni–tikşerenü institutın Rossiä külämendä yaxşı belälär. RF töbäklärendä institut ğalimnäre tarafınnan rayonlaştırırğa täqdim itelgän awıl xucalığı kul'turalarınıñ küp kenä sortları üsterelä. Misal öçen, Rossiä Federatsiäsendä här öçençe gektarda Tatarstan awıl xucalığı fänni–tikşerenü institutı seleksionerları tarafınnan kiterep çığarılğan qaraboday çäçälär. Rossiädäge 12 iqtisadi töbäkneñ 10 sında institut seleksionerlarınıñ icat cimeşlärenä östenlek birälär.
Agronomiä forumında institut ğalimnäre awıl xucalığı kul'turalarınıñ yaña sortların täqdim itäçäk. Alar arasında “Tantana” közge arışı, “Nadejda” közge bodayı, “Eqada–66” saban bodayı, “Timerxan” arpası, “Varis” häm “Watan” borçağı, “Batır” häm “Nikol'skaya” qarabodayı, “Bäxetle” tarısı, “Yumart” rapsı häm başqalar bar. İnstitut mögezle ere terlek, duñız häm yort qoşları öçen azıq östämäläre, şulay uq ciläk–cimeş kul'turalarınıñ yaña sortların täqdim itäçäk.