Ğosman İsxaqi: “İñ möhime – bez möselman ömmäteneñ berdämlegen saqlap qala aldıq”

2 Fevral' 2010 г., 09:40

(Qazan, 2 fevral', “Tatar–inform”). “İñ möhime – bez möselman ömmäteneñ berdämlegen saqlap qala aldıq”. Tatarstan möftie, TR möselmannarı Diniä näzäräte räise Ğosman xäzrät İsxaqi 27 fevral'dä uzaçaq TR Möselmannarınıñ IV syezdı aldınnan TR möselmannarı Diniä näzäräte eşçänlegeneñ näticäläre xaqındağı sorawğa änä şulay dip cawap birde.
Ğosman xäzrätneñ süzlärenä qarağanda, 12 yıl eçendä şaqtıy eş başqarılğan: Diniä näzäräte qarşında propaganda, däwlät strukturaları, xärbilär, cäzalarnı ütätü Federal' xezmäteneñ TR buyınça baş idaräse uçrejdenieläre belän üzara xezmättäşlek, zäkyät, xac, waqıf bülekläre, şulay uq “Xäläl” standar komitetı oyıştırılğan.
“İñ möhime – 12 yıl eçendä bez Tatarstanda möselmannarnıñ berdämlegen saqlap qala aldıq, bügen Rossiädä küplär änä şul xaqta söyli. Bu yıllarda ızğış–talaş, suğışlar bulmadı, analarnıñ küz yäşe tügelmäde. Bu – iñ ähämiätlese. Tağın şunı östäp äytäsem kilä, bez täqwalıqqa östenlek biräbez”, – dide TR möselmannarı Diniä näzäräte räise «Tarxan.biz» gazetasına birgän interv'yusında.
Ul assızıqlap ütkänçä, ilebezdä din däwlättän ayırılğan. “Monda ratsional' başlanğıç bar, ämma qıyınlıqlar da yuk tügel. Däwlätneñ bezneñ eşlärgä älläni qısılmawı – yaxşı küreneş. Töp citeşsezlek şunda, TR möselmannarı Diniä näzäräte byudjettan finanslanmıy. Bügen bezneñ struktura şaqtıy zur häm bez küpmeder külämdä finans qıyınlığı kiçeräbez. Şunlıqtan bez waqıflar sistemasın yañadan torğızırğa buldıq. Ğaräp illärendä dini idarä bularaq mondıy struktura yuk. Anda waqıflar, irşad häm din eşläre buyınça ministrlıyklar bar. Waqıf – ul böten möselman ömmäteneñ tartıp alıp bulmıy torğan milke, häm waqıflar eşçänlege tabış kiterügä yunälderelgän. Biredä nindi dä bulsa yaña äyber uylap tabu ixtıäcı yuk, waqıflar sistemasın yañadan torğızırğa ğına kiräk. Älege ölkädä täcribä tuplaw maqsatınnan bezneñ xezmätkärlär Törkiä häm Küwäytkä barıp qayttı”, – dip östäde TR möftie.