Tatarstan ğalimnäre Rossiä agronomiä forumında qatnaşa

1 Fevral' 2010 г., 11:30

(Qazan, 1 fevral', “Tatar–inform”, İrina İgnat'yeva). Tatarstan ğalimnäre Rossiä agronomiä forumında qatnaşa. Kiñäşmädä 2009 yılda üsemlekçelek tarmağında başqarılğan eşkä näticä yasalaçaq. Tatarstannan forumda TR buyınça “Rossiä awıl xucalığı üzäge” federal' däwlät uçrejdeniesendä eşlängän “Agrosemekspert” programması avtorları qatnaşaçaq. Bu xaqta “Tatar–inform” agentlığına älege filialnıñ citäkçese Tahir Hadiew xäbär itte.
4–5 fevral' könnärendä RF Awıl xucalığı ministrlıygında Rossiä Federatsiäse subyektlarınıñ ağrosänäğät kompleksı orğannarı citäkçeläre urınbasarları, Rossiä awıl xucalığı akademiäseneñ struktur bülekçäläre citäkçeläre, RF Awıl xucalığı ministrlığı qaramağındağı uçrejdenie başlıqları, tarmaq assotsiatsiäläre häm berlekläre wäkilläre qatnaşında agronomiä kiñäşmäse uzaçaq.
Kiñäşmädä 2009 yılda üsemlekçelek tarmağında başqarılğan eşkä näticä yasalaçaq, awıl xucalığın üsterü buyınça Däwlät programmasıyndağı kileşülärne ütäwgä qağılışlı mäs'älälär qaralaçaq. Kiñäşmädä qatnaşuçılarğa tawar citeşterüçelärne yazğı awıl xucalığı eşlären ütkärü öçen kredit, matdi–texnik häm başqa resurslar belän tä'min itü turında mäğlümat biräçäklär.
TR buyınça “Rossiä awıl xucalığı üzäge” federal' däwlät uçrejdeniese wäkilläre forumda küptän tügel eşlängän, orlıqlarnı onlayn rejimında 20 parametr buyınça tikşerergä mömkinlek birüçe “Agrosemekspert” programmasın täqdim itärgä niätli. Orlıqlarnı komp'yuter programması yärdämendä Tatarstannıñ teläsä qaysı xucalığında tikşerergä mömkin. “Agrosemekspert” Rossiä Federatsiäseneñ här töbägendä qullanıla ala.