Tatarstan parlament delegatsiäseneñ AQŞqa täwge räsmi vizitı tögällände

1 Fevral' 2010 г., 10:29

(Qazan, 1 fevral', “Tatar–inform”). Tatarstan Respublikası parlament delegatsiäseneñ AQŞqa täwge räsmi vizitı tögällände.
Räsmi vizit qısalarında Färit Möxämmätşin AQŞ Kongressı häm Senatında, Aq yortta, Milli qurqınıçsızlıq sovetında berniçä oçraşu ütkärde, N'yu–York ştatı parlamentı belän üzara añlaşu turındağı Memorandumğa qul quydı, N'yu–York ştatı däwlät universitetı («State University of New York» (SUNİ) belän berläşterelgän yuğarı uqu yortları citäkçeläre häm uqıtuçılar belän oçraştı.
Tatarstan parlamentı başlığı şulay uq Olbani universitetı rektorı belän oçraştı, N'yu–York ştatı däwlät universitetı kölliätendä buldı. Kölliättä Tatarstannıñ “İdeya” innovatsiä–citeşterü texnoparkı täqdim itelde.
“İdeya” innovatsiä–citeşterü texnoparkı general' direktorı Sergey Yuşkonıñ dokladın SUNİ nano–kölliäte ğalimnäre yuğarı bäyäläde. Oçraşu näticäläre buyınça nanotexnologiälär ölkäsendä urtaq eşçänlekne oyıştıru häm älege tarmaq öçen kadrlar äzerläw, “İdeya” innovatsiä–citeşterü texnoparkı bazasında nanotexnologiälär üzäge buldıru maqsatınnan Memorandum tözelde, dip xäbär itä TR Däwlät Sovetınıñ matbuğat xezmäte.
N'yu–Yorkta Färit Möxämmätşin SUNİ sistemasına kerüçe Levin institutı ğalimnäre belän oçraştı. Älege institut AQŞ däwlät uçrejdenieläre öçen kadrlarnı yañadan äzerläw belän şöğıllänä häm Rossiäneñ qayber yuğarı uqu yortları, ayırım alğanda, Mäskäw däwlät xalıqara mönäsäbätlär institutı belän xezmättäşlek itä. Oçraşuda qatnaşuçılar fänni häm akademik elemtälärne kiñäytü, ğalimnär häm yäş belgeçlär belän üzara almaşunı cayğa salu xaqında kileşte.
TR Däwlät Sovetı delegatsiäse vizit axırında Rossiä Federatsiäseneñ BMO qarşındağı daimi wäkile Vitaliy Çurkin belän oçraştı. Färit Möxämmätşin aña AQŞqa vizitnıñ töp näticäläre xaqında mäğlümat birde. Äñgämä barışında Vitaliy Çurkin Qazanda sivilizatsiälär dialoğı qısalarında BMO ximayäsendä zur Xalıqara forum ütkärü telägen belderde.
Federal' häm töbäk xaqimiätläre wäkilläre belän oçraşu barışında Qazanda İdel buyı töbägendä AQŞ General' konsullıygın açu mömkinlege xaqında fiker alışındı.