Älege kürgäzmä Möxämmät Arslanovnıñ tuuına 100 yıl tuluğa bağışlana

(Ufa, 29 ğinwar, “Tatar-inform”, Fänis Fätxullin). Ufadağı M. Nesterov isemendäge däwlät sänğat muzeenda kürenekle tatar rässamı Möxämmät Arslanovnıñ kartinalarınnan kürgäzmä açıldı. Älege kürgäzmä oluğ talant iäseneñ tuuına 100 yıl tuluğa bağışlana.
Möxämmät Nuriäxmät ulı Arslanov Başqortstannıñ Kuşnarenko rayonındağı Mämäk isemle matur tatar awılında tuıp üsä. 1930 yılda Ufa sänğat texnikumın tämamlıy ul. Ä 1931-1934 yıllarda Sankt-Puturburgtağı İ. YE. Repin isemendäge institutta belem ala.
Möxämmät Arslanov Başqortstanda teatr dekoratsiäläre häm kostyumnarı surätlären hönäri eşläwçe, şuşı tör sänğat'kä nigez saluçı bulıp isäplänä. Ul ğomere buyı M. Ğafuri isemendäge Başqort däwlät akademiä drama teatrında häm Başqort däwlät opera häm balet teatrında icat itte. Cämğıse 200 dän artıq spektakl'ne bizäde ul.
Möxämmät Arslanovnıñ ilhamlı icatı yuğarı bäyälände. RSFSRnıñ atqazanğan sänğat eşleklese, Başqortstannıñ xalıq rässamı digän maqtawlı isemnär aldı talantlı millättäşebez.
Ufada açılğan kürgäzmägä bik küp rässamnar, sänğat belgeçläre, M. Arslanovnıñ balaları, onıqları kilgän ide. M. Arslanovnıñ ulı Räfqat ätiseneñ keşe bularaq sıyfatları xaqında söyläde. “Minem qızım Diana da babası hönären sayladı – rässam buldı. Dimäk icat däwam itä”, - dide ul. Diana bügenge köndä Mäskäwdä yäşi, ämma bu kürgäzmäne açu tantanasına Ufağa maxsus qaytqan ul. Rässam hönären saylawda babasınıñ yoğıntısı köçle buluın äytte ul häm anıñ belän ğorurlanuın belderde.