Aeroport xezmätkärläre mondıy yarışlarda yıl sayın qatnaşa häm prizlı urınnar yaulıy

(Qazan, 26 ğinwar, “Tatar–inform”). Tatarstannıñ transport kompleksı predpriätieläre xezmätkärläre 2009 yılnıñ mart–dekabr' aylarında “Sälämätlek–2009” Spartakiadası qısalarında respubliqa berençelegendä aktiv qatnaştı. Yarışlar sportnıñ şaxmat, şaşqa, darts, çañğıda uzışu, mini–futbol, voleybol, mıltıqtan atu, östäl tennisı, stritbol kebek törläre buyınça ütkärelde.
Uzğan yarışlarnıñ näticäläre buyınça “Qazan” Xalıqara aeroportı” AAC komandası III gomumkomanda urının yauladı häm III däräcä diplom belän büläklände. Spartakiadada 12 predpriätiedän kollektivlar qatnaştı.
Aeroport xezmätkärläre mondıy yarışlarda yıl sayın qatnaşa häm prizlı urınnar yaulıy. Mondıy yuğarı näticälärgä alar komandanıñ oyışqanlığı, ciñügä omtılış näticäsendä ireşä.
Aeroport citäkçelege alğa taba da xezmätkärlärneñ sport belän şöğıllänüen xuplarğa niätli, çönki sport sälämätlekne genä nığıtıp qalmıy, xezmättä yaxşı näticälärgä ireşergä dä bulışa, dip xäbär itä predpriätieneñ matbuğat xezmäte.