Başqortstannıñ xalıq şağire Marat Kärimownıñ 80 yäşen bäyräm itälär

22 Ğinwar 2010 г., 09:57

(Ufa, 22 ğinwar, “Tatar-inform”, Fänis Fätxullin). Marat Kärimowqa 80 yäş tuldı. Şuşı uñaydan bügen anıñ tuğan yağı - Başqortstannıñ Ziançura rayonında yubiley çaraları başlanıp kitte.
Marat Kärimownıñ kürkäm tuğan köne uñayınnan yaktaşları bay mädäni programma äzerlägän. Rayon mäktäplärendä häm kitapxanälärendä, anıñ icatına bağışlap, kürgäzmä poçmaqlar äzerlängän. Bügen häm irtägä Marat ağanıñ tuğan awılı Kügärçendä häm rayon üzäge Ziançurada xalıq belän oçraşular häm yubiley kiçäläre ütä. Ufadan Marat ağanı qotlarğa baytaq ädiplär häm jurnalistlar da kitte.
Marat Näbi ulınıñ yubilee fevral' ayında Ufada da zurlap bäyräm iteläçäk. Ul çaralarğa Qazannan da qunaqlar kötelä.
Marat Kärimow törle yıllarda näşer itelgän yegermedän artıq şiğır häm proza kitapları avtorı. Anıñ berençe şiğır cıyıntığı 1956 yılda “Börelär” iseme belän çıqqan. 2003 yılda talantlı millättäşebezgä “Başqortstannıñ xalıq şağire” digän abruylı isem birelde.
Marat ağa Kärimow Başqortstan Yazuçılar berlegendäge tatar telle yazuçılar berläşmäsenä dä berniçä yıl citäkçelek itte. Şul yıllar eçendä, respublikanıñ bixisap tatar rayonnarında bulıp, ädäbi icatqa sälätle yäşlärne häm başlap yazuçılarnı tabuda häm alarnı cämäğätçelekkä täqdim itüdä bäyäläp betergesez zur häm igelekle eşlär başqardı M. Kärimow. Anıñ yärdämendä ädäbiätqa kilgän küp kenä tatar qaläm ähelläre xäzer Yazuçılar berlege äğzaları bulıp kitte häm üz cıyıntıqların çığardı.