Tatar xalqınıñ asıl ulı, Rossiäneñ atqazanğan, Başqortstannıñ xalıq artistı İlfaq Smakovnıñ tuuına 70 yıl tuldı

(Ufa, 21 ğinwar, “Tatar-inform”, Fänis Fätxullin). Tatar xalqınıñ asıl ulı, Rossiäneñ atqazanğan, Başqortstannıñ xalıq artistı İlfaq Smakovnıñ tuuına 70 yıl tuldı. Şuşı uñaydan respublikada anı iskä alu çaraları başlandı.
İlfaq Smakov, başqa bik küp tatar sänğat ostaları kebek ük, Başqortstan cır sänğaten biek ürlärgä kütärgän iskitkeç talantlı cırçı ide. Çaqmağış rayonınıñ Rapat awılında tuıp üskän İlfaq, äle mäktäptä uqığan yıllarında uq, üzeneñ cırçı säläte belän küplärne soqlandıra. Başta mäktäptä, annan awıl klubında anıñ qatnaşuınnan başqa ber genä konsert ta ütmi. Mäktäpneñ tuğızınçı sıynıfında uqığanda uq, Ufada sälätle uquçılarnıñ respubliqa olimpiadasında täwge zur uñışqa ireşä ul. Başqort xalıq cırı “Azamat”nı häm Äkram Dawtownıñ “Äniemä xat”ın iskitkeç ostalıq belän başqarıp, jyuri äğzaların äsir itä ul. Älege bäygedän laureat iseme belän qayta İlfaq. Näq şul çaqta nıqlı qararğa da kilä - üzen barı tik cır sänğatenä genä bağışlarğa.
Ufa sänğat uçilişçesında uqığanda, mäşhür möğallimä Miläwşä Mortazinnıñ iñ yaratqan häm iñ sälätle şäkerte bula İlfaq. Uçilişçeda belem alğanda da, törle däräcäle icat bäygelärendä qatnaşıp, matur ciñülär yaulıy yäş cırçı. Dürtençe kursta uqığanda Mäskäwgä barıp, andağı estrada artistları Bötenrossiä yarışmasında da qatnaşa İlfaq häm Ufağa diplomant iseme belän qayta.
İlfaq Smakov, ğomereneñ azağına qadär, Başqortstan däwlät filarmoniäsendä xezmät itte. Başqortstan, Tatarstan buylap qına tügel, ä tatar belän başqortlar yäşägän bik küp başqa töbäklärne dä urap çıqtı ul üzeneñ cır-moñnarı belän. İlfaq Smakov başqaruındağı “Ciz qıñğıraw moñnarı”, “Zimfiräkäy”, “Sin qaytmadıñ”, “Cil, ciränem”, “Bılbılım”, “Tuğan ilem”, “Sinder ul dip uyladım”, “Duslarıñnı onıtma!”, “Äqlimä”, “Äytkän ideñ”, “Aq paroxod” kebek distälärçä populyar cırları tatar häm başqort cır sänğateneñ altın fondına kerep qaldı.
İlfaq Smakov ğomereneñ soñğı unbiş yılında tanılğan cırçı Asiä Smakova belän tormış qorıp yäşäde. Alarnıñ duet bularaq başqarğan cırları da baytaq. Äle Asiä xanım söekle ireneñ 70 yıllığı uñayınnan maxsus konsert programması äzerläde häm anı respubliqa rayonnarında häm şähärlärendä täqdim itä. “Ayırılıp bulmıy yazmıştan” isemle älege programmada Başqortstannıñ xalıq artistkası Gölsem Xäbibullina, Ufa “Nur” tatar däwlät teatrınıñ äydäwçe akterı, Başqortstannıñ atqazanğan artistı Mäxmüt Fatıyyxov, populyar cırçılar Rişat Galixanov häm Salawat Äqsänow qatnaşa.
İlfaq Smakovnı iskä alu çaraları bu könnärdä Çaqmağış rayonında da uza. Anda talantlı yaktaşlarınıñ istälegen qaderläp saqlıylar. İlfaq Smakovnıñ Rapat awılındağı qaberenä bronza barel'yeflı märmär häykäl quyılğan. Andağı yaña tözelgän mädäniät yortına İlfaq Smakov iseme birelgän. Mädäniät yortında häm awıl mäktäbendä İlfaq Smakovqa bağışlap muzey bülmäläre eşlängän.
Başqortstan matbuğatında İlfaq Smakovnıñ tuuına 70 yıl tuluğa bağışlanğan yazmalar da basıla başladı. Bügen “Qızıl tañ” tatar gazetası üzeneñ tulı ber biten diärlek oluğ talant iäsenä bağışlağan. Tanılğan jurnalist, küp maqtawlı isemnär häm icadi büläklär iäse Färit Fatqullinıñ “Sünsä sünsen utlar, minutlar da, mindä äle sünmäs ömet bar...” isemle külämle yazması İlfaq Smakovnıñ tormış yulı häm anıñ qabatlanmas icatı xaqında ğayät bay häm qızıqlı mäğlümatlar birä.