Qazan regbiçıylarına altın medal' häm Quboqlarnı Qazan däwlät agrar universitetı rektorı Cäwdät Fäyzraxmanow tapşırdı

(Qazan, 13 ğinwar, “Tatar–inform”). Kiçä Qazan däwlät agrar universitetında “Dinamo” (Qazan) respubliqa olimpiä rezervı balalar–yäşüsmerlär sport mäktäben – regbi–7 buyınça traditsion Bötenrossiä Raştua turnirı ciñüçelären büläkläw tantanası buldı.
Qazannıñ yäş regbiçıylarına altın medal' häm Quboqlarnı Tatarstan Respublikası Regbi federatsiäse prezidentı, Qazan däwlät agrar universitetı rektorı Cäwdät Fäyzraxmanow tapşırdı.
Turnir 8–9 ğinwar könnärendä Penzada uzdı, dip xäbär itä Qazan däwlät agrar universitetınıñ matbuğat xezmäte. Kapitan Sergey Niqolayıwski citäkçelegendäge 1992–93 yılda tuğan Qazan regbiçıyları berençe öç matçta üz köndäşlärennnän östen çıqtı, yarıymfinalda 37:0 isäbenä ottı häm Rossiä çempionnarı – Krasnodarnıñ “Yug” yäşüsmerlär komandası belän final oçraşuında 12:10 isäbenä turnirda xälitkeç ciñü yauladı.
1998–1999 yılğı regbiçıylar da (trenerları – Pawel Qalaşkin) alardan qalışmadı, barlıq matçlarda da üz köndäşlären birelderep, berençe urınğa layık buldı.
Tatarstan Respublikası Regbi federatsiäse prezidentı Cäwdät Fäyzraxmanow bilgeläp ütkänçä, 2013 yılğı Universiada aldınnan layıklı yäşlär üsep kilä. “Näq menä alar 2013 yılğı Universiadada çığış yasayaçaq häm 2016 yılda Rioda ütkärü küzdä totılğan Olimpiadada qatnaşu xoquqın yaulaw öçen köräşäçäk. İke yäş törkemendäge Tatarstan kollektivlarınıñ mondıy turnirlarda ciñüe bezdä regbinıñ kiläçägenä zur optimizm belän qararğa mömkinlek birä”, – dip belderde ul.
Xäzerge waqıtta Tatarstan Respublikası Regbi federatsiäse häm TR Yäşlär eşläre, sport häm turistlıq ministrlığı citäkçelege 2010 yılnıñ ğinwarında 1993–94 häm 1995–96 yılğı yäşüsmerlär arasında regbi–7 buyınça TR açıq berençelegen ütkärergä äzerlänä. İjau, Penza, Samara, Tübän Novgorod, Sankt–Peterburg häm Mäskäw kollektivları Qazanda uzaçaq älege turnirda qatnaşırğa teläk belderde inde.