Zilä Wäliewa tatarstanlılarnı Rossiä matbuğatı köne belän qotladı

13 Ğinwar 2010 г., 12:07

(Qazan, 13 ğinwar, “Tatar–inform”). TR Prem'yer–ministrı urınbasarı – mädäniät ministrı Zilä Wäliewa jurnalistlar, näşirlär, poligrafçıylar häm matbuğat veterannarın Rossiä matbuğatı köne belän qotladı, dip xäbär itä TR Mädäniät ministrlığınıñ matbuğat xezmäte.
“Sezne ixlas küñeldän hönäri bäyräm – Rossiä matbuğatı köne belän täbrik itäm! Älege kön tarixi data – 1703 yılnıñ 13 ğinwarında Rossiädä berençe gazeta – “Wedomosti”nıñ çığa başlawı belän bäyle. İlebezdä waqtılı matbuğatnıñ 300 yıldan artıq tarixı bar, bu çorda Rossiä jurnalistikası zur sınawlar kiçerde. İqtisadi krizis respublikabıyznıñ mediatarmağı öçen dä nıqlıqqa sınaw buldı. Ämma xäzerge qatlawlı wäzğıättä dä Tatarstannıñ basma ğammäwi mäğlümat çaraları Rossiä Federatsiäse mäğlümat kiñlegendä äydäp baruçı pozitsiälärne saqlıy häm Rossiäneñ küp kenä töbäkläre öçen aktiv üseş ürnäge bulıp tora.
Sotsial' ähämiätkä iä waqıtlı basma matbuğatqa yärdäm kürsätü, yaña mäğlümati texnologiälärne ğamälgä kertü, federal' basmalarnıñ xäbärçelär punktı eşläwe näticäsendä respublikada yäşäwçelär Tatarstan häm Rossiädä genä tügel, çit ildä bulğan waqiğalarnı da belep tora.
Xäzerge waqıtta Tatarstan territoriäsendä 968 basma ğammäwi mäğlümat çarası, şul isäptän tatar telendä 112 gazeta häm 28 jurnal, çuaş telendä 5 gazeta, şulay uq udmurt telendä çığuçı Baltaç rayon gazetası terkälgän.
Rayon matbuğatın reformalaştıru basma ğammäwi mäğlümat çaraların üsterü ölkäsendä Tatarstannıñ möhim qazanışı buldı, rayon gazetaların saqlap qalu belän bergä, eçtälekläre häm bizäleşläre yağınnan yaña däräcägä kütärügä ireşelde. “Tatarstan” häm “Yalqın” jurnallarınıñ konsepsiäse häm formatı üzgärde, küptän kötelgän mädäni mediaproekt – rus telendäge “Arğamaq” ädäbi al'manaxı çığa başladı.
Xörmätle duslar! Sezneñ operativ häm sıyfatlı eşläwegez näticäsendä respublikanıñ mäğlümat kiñlege eçtälek yağınnan tağın da bayıy, bügenge uquçınıñ ixtıäclarına cawap birä. Sezgä nıqlı sälämätlek, yaña icat ciñüläre, tiraj häm reytinglarıygıyznıñ üsüen teläp qalam”, – dielä TR Prem'yer–ministrı urınbasarı – mädäniät ministrı Zilä Wäliewanıñ qotlawında.