Başqortstannıñ xalıq şağire Marat Kärimowqa 80 yäş tuldı. Şuşı uñaydan bu könnärdä törle taraflardan qotlawlar qabul itä ul

(Ufa, 11 ğinwar, “Tatar-inform”, Fänis Fätxullin). Başqortstannıñ xalıq şağire Marat Kärimowqa 80 yäş tuldı. Şuşı uñaydan bu könnärdä törle taraflardan ixlas qotlawlar qabul itä ul.
Başqortstannıñ Ziançura rayonındağı Kügärçen isemle bik matur tatar awılında tuıp üskän Marat Kärimownıñ zur talant iäse bulaçağı mañğayına uq yazılğan bulğan küräseñ. Keçkenädän ük icat belän şığıllänergä yaratqan sälätle malay yäştäşläre arasında üzeneñ gel şiğıranä teldä söyläşergä yaratuı belän ayırılıp tora.
Mäktäpne tämämlağannan soñ, Marat Kärimow başta Irımburda, annan soñ Zilayır pedagogiä uçilişçesında uqi. Armiä xezmätennän äylänep qaytqaç, yäş belgeç Ufadağı “Leninçı” gäzitendä jurnalist hönäre neçkäleklärenä öyränä. Annan soñ Mäskäwdä başta yuğarı komsomol kurslarında, soñraq ädäbi kurslarda belem alu yılları bay täcribä birä yegetkä.
Ufağa äylänep qaytqaç, Marat Kärimow tulısınça jurnalistikağa häm ädäbi icatqa çuma. “Pioner” häm “Hänäk” jurnallarınıñ baş möxärrire wazıyfaların başqara, respubliqa televidenieseneñ ädäbiät redaksiäsendä xezmät itä. Şul yıllarda jurnalist eşçänlegen ädäbi icat belän bergä alıp bardı talantlı şäxes.
Törle tellärdä distälägän şiğır häm proza kitapları dönya kürde anıñ. İcatında liriqa östenlek alsa da, Marat Kärimow satira häm yumor ostası bularaq tanıldı. Bu cähättän Başqortstan ädäbiätın yuğarı basqıçqa kütärde ul. Xätta şul çäneçkele icatı öçen talantlı şäxes şaqtıy yıllar buyı respublikada törleçä basımnarğa da duçar bulu çorın kiçerde. Ämma şundıy kimsetelülärne dä, yazmışına buysınmıyça, ğorur ciñep çıqtı oluğ ädip.
Marat ağa Başqortstan Yazuçılar berlegendäge tatar telle yazuçılar berläşmäsenä dä berniçä yıl citäkçelek itte. Şul yıllar eçendä, respublikanıñ bixisap tatar rayonnarında bulıp, ädäbi icatqa sälätle yäşlärne häm başlap yazuçılarnı tabuda häm alarnı cämäğätçelekkä täqdim itüdä bäyäläp betergesez zur häm igelekle eşlär başqardı M. Kärimow. Anıñ yärdämendä ädäbiätqa kilgän küp kenä tatar şağirläre häm prozaikları xäzer Yazuçılar berlege äğzaları bulıp kitte häm üz cıyıntıqların çığardı.
Äle üzeneñ 80 yäşlek yubileen da aqsaqal şağirebez ilhamlı icatta qarşıladı. Anıñ saylanma äsärläreneñ 3 tomlığı Başqortstannıñ Zäynäp Biişewa isemendäge däwlät ”Kitap” näşriätında dönya kürde. Xäzer şunda uq 4 nçe häm 5 nçe tomnarı çirat kötep yata.
Xalıq şağireneñ tügäräk yubilee çaraları ğinwar azağında Ziançura rayonı üzgendäge mädäniät sarayında häm anıñ tuğan awılı Kügärçendä zurlap bilgelänäçäk. Anda Tatarstan ädipläre dä qunaqqa kiläçäk.