Leningrad ölkäse "Yuldaş" tatar-başqort cämğıätenä - 10 yıl

20 Noyabr' 2009 г., 11:00

(Sankt-Peterburg, 20 noyabr', “Tatar–inform”, Zäriä Xäsänowa). Şuşı könnärdä Leningrad ölkäse Gatçina şähärendäge "Yuldaş" tatar-başqort cämğıäte yubileen bilgeli. Älege cämğıät monnan 10 yıl elek tözelde. Bu waqıt eçendä biredä yäşäwçe millättäşlär häm yaktaşlar küp soqlanırlıq eşläre belän tanılırğa ölgerde.
Gatçinada här milli bäyrämne, xalıq yolasın bilgeläp ütü xäzer matur ğadätkä äylände. "Yuldaş"nı Leningrad ölkäse Yustitsiä idaräsendä terkätü öçen aktivistlar Foat Cäläyew, Liliä Nuretdinova häm Venera Mindebaeva başlap yöri. Cämğıät tatar tele häm islam mädäniäten öyränü buyınça yakşämbe mäktäbe aça. Qızğanıçqa qarşı, bügen biredä tuğan tel öyränelmi. Ämma tatar mädäniäten öyränü buyınça törle çaralar – leksiälär, konsertlar oyıştırıla. Saniä Qormaqayıwa uqığan mönäcätlär ayıruça dulqınlandırğıç.
Biredä milli çaralarğa balalarnı da cälep itüläre matur ürnäk.