Başqortstan tatarı “Berdäm Rossiä”dä cawaplı wazıyfağa bilgelände

11 Noyabr' 2009 г., 17:13

(Ufa, 11 noyabr', “Tatar-inform”, Fänis Fätxullin). Başqortstan däwlät pedagogiä universitetı rektorı, BR Däwlät Cıyılışı-Qorıltay deputatı Rail Äsadullinğa tağın ber cawaplı wazıyfa yöklätelde.
“Berdäm Rossiä” firqase Başqortstan bülege Politklubınıñ koordinatsiä şurası räise itep täğäyenlände ul bügen. Älege Politklub 2005 yılda oyıştırılğan ide. Aña älegä qadär Engel's Qolmöxämätow citäkçelek itte. Läkin ul yañaraq, RF Däwlät Duması deputatı bularaq eşe küplegen säbäp itep, “Berdäm Rossiä” citäkçelegennän kitüe turında qarar itte.
Rail Äsadullin soñğı yıllarda Başqortstan däwlät pedagogiä universitetınıñ rektorı bulıp eşli. Añarçı berniçä yıl prorektor wazıyfaların başqarğan ide.
Rail Mirway ulı Başqortstan tatar cämäğätçelek eşlärendä qatnaşuı belän dä bilgele. Ul - Bötendönya Tatar kongressı Başqarma komitetı äğzası. Şulay uq “Watanım” bötenrossiä tatar oyışmasınıñ Başqortstan bülegenä dä citäkçelek itä ul. Qayber xäbärlärgä qarağanda, kiläse yıl başında Ufada Başqortstan tatarları qorıltayın ütkärep, anı BR Tatar kongressı räise itep täğäyenläyäçäklär.