İñ täwdä alar Mäskäw belän Sankt-Peterburgta açıla

(Ufa, 7 sentyabr', “Tatar-inform”, Fänis Fätxullin). Bötendönya Başqort qorıltayı Başqarma komitetınıñ Yäşlär şurası Rusiäneñ iñ zur şähärlärendä üzeneñ büleklären buldıraçaq.
İñ täwdä alar Mäskäw belän Sankt-Peterburgta açıla.
Bu xaqta Bötendönya Başqort qorıltayı Başqarma komitetınıñ Yäşlär şurası üzeneñ çirattağı utırışında qarar itte. Başqort yäşläre eşne ozaqqa suzmasqa buldı. Mäskäw belän Piterdağı büleklärne tözü cıyılışları bu atnada uq ütäçäk.
Başqort yäşläre ilneñ ike zur başqalasında üzläreneñ büleklären tözüdä nindi maqsatlar quya? Bötendönya Başqort qorıltayı Başqarma komitetınıñ Yäşlär şurası räise Timur Lokmanov jurnalistlar belän aralaşuda menä nilär äytte: “Soñğı yıllarda Mäskäwdä dä, Piterda da başqort yäşläre sizelerlek arta başladı. Bıyıl ğına da maqsatlı programma belän Başqortstannan 130-140 yäş keşe Mäskäw häm Piter yuğarı uqu yortlarına uqırğa kerde. Şuña kürä dä alarnı milli xäräkätkä, mädäni çaralarğa cälep itü kiräk”, - di Timur Lokmanov.
Başqort yäşläre şurası tağın da ber yaña proektın aşıraçaq ikän. Timur Lokmanov süzlärençä, xäzer millät yäşlären säyäsätkä cälep itü burıçları da quyıla. Bu eşne canlandıru maqsatında, “İctimaği säyäsät mäktäbe” digän yaña ğilem estäw üzäkläre eşli başlıy. “Alarğa törle uqu yortlarındağı, şulay uq başqort ictimaği oyışmalarındağı millät yäşläre saylap alınaçaq. Leksiälärne yäş säyäsätçelär, ğalimnär, däwlät eşlekleläre uqıyaçaq”, - di Timur Lokmanov.
Şulay itep başqort yäşläre zur şähärlärdä dä üz yoğıntı-tä'siren köçäytmäkçe. Mäskäw belän Piter kebek ere şähärlärdä alar küp tügel. Läkin başqort yäşläre küläm belän tügel, ä sıyfat belän aldırırğa isäp tota. Başqort yäşläre oyışmaların tözü cıyılışları Mäskäwdä 12 sentyabr'dä, ä Sankt-Peterburgta 13ендђ ütäçäk.